Heroin kawltu kum 14 táng dawn

August 2023-a Manipur aṭanga heroin hawng 92 kengtu Seikholen Khongsai (45) s/o Hemkhothong Khongsai, Saikot, Churachanpur, Manipur chu Kolasib Fast Track Court-in kum 14 chhung jail-a tâng tur leh Rs 1,00,000 chawi turin a hrem.

Court thuremnaa tarlan danin, Seikholen Khongsai hian Manipur aṭangin Mizoramah lirthei Gypsy, registration number inbel lo hmangin heroin a phur lut a, Kolasib police-te'n August 21, 2023 chhun dar 1:20-ah Thingdawlah lo tidingin, Gypsy chhunga thuhruk heroin hawng 84 (Kg. 1.64) an man a, tualchhunga hralhna angin Rs 16,80,000 hû a ni.

Gypsy-a chuang ve mi pakhat inpuanna aṭangin Kolasib police-te chuan August 22, 2023 zing dar 9:30-ah chuan Gypsy aṭang thoin heroin hawng 8 an man leh bawk. Heroin-te chu Kangvai Frontline duty commander pakhat leh Seikholen Khongsai ten Myanmar aṭanga an chah luh, Mizorama hralh tura an rawn lak luh a ni.

He thubuai hi Kolasib Fast Track Court chuan a ngaihtuah a, judge R Vanlalena'n nimin khan thultukna a puang. Seikholen Khongsai chu hrehawm taka kum 14 chhung táng tur leh Rs 1,00,000 chawi tura tih a ni a, pawisa a chawi loh chuan thla ruk dang tân belh tura tih a ni bawk.

Seikholen Khongsai ruala man ve mi dang pathum erawh chu lirthei chhunga heroin thuhrûk an hriatpui ngei a ni tih finfiahna ṭha tâwk a awm loh avangin Court chuan a chhuah zalên thung.