KHAWTHLIR

Damdawi pe

Ruihhlo ngaite enkawlna leh chhan chhuahna tura July 21, 2025 aṭanga Hulhliap Short Stay Centre thawh hnihna buatsaih tur leh, Central YMA-in July 19, 2025-a OKM Home, Phunchawnga health clinic an buatsaih tur atan Mizoram Chemists & Druggists Association chuan nimin khan damdawi chi hrang hrang an pe. Damdawi an pek hi Rs 5,00,000 chuang man a ni.

Dealers Conclave

All India Petroleum Dealers Association chuan nimin khan India Habitat Centre, Delhi-ah 'Dealers Conclave' an buatsaih a, Union Petroleum and Natural Gas minister Hardeep Singh Puri-a'n a hmanpui. Conclave-ah hian Mizoram aṭangin Assembly speaker Lalbiakzama leh All Mizoram Petroleum Dealers Association president K Lalnghakliana te an tel a ni.

CII hotute leh CM

Chief minister Lalduhoma chuan nimin khan a pisaah Confederation of Indian Industry - Centre of Excellence for Livelihood head Shivekgurubarran G leh CII NE Region senior director Shalini Thapa te a kâwm. CII hotute chuan, Mizoram chu India hmarchhak biala hmalakna hmasa ber atan an ît thu an hrilh a, CM chuan Planning department hotute sawipui turin a kawhhmuh a, an kal dante ziaka thehlut turin a chah.

Freshers' Social

Aizawl West College chuan July 17, Ningani khan Vanapa Hall-ah Freshers’ Social an hmang a, minister of state Prof. Lalnilawma'n hmanpuiin, college annual magazine ‘Thlado’ a tlangzarh. Mizoram University undergraduate examination 2025-a Aizawl West College zirlai zinga rank Holder-te hnenah chawimawina hlan a ni bawk.

Zirlai chawimawi

Mizo Students' Union (MSU) District Headquarters, Hnahthial chuan nimin khan zirlai ti ṭha lawmpuina an buatsaih a, Hnahthial additional DC Zothanmawia Khiangte khuallian a ni a, Treasury officer H Lalrinliana khualzahawm niin, MSU Gen.Hqrs general secretary Zodinsanga uaptu a ni. MSU, Hnahthial hian zirlai 26 hnenah chawimawina an hlan.

Mamit College zirlaite lawmna

Minister of state B Lalchhanzova chuan nimin khan Mamit College Freshers Social cum Graduation Day a hmanpui a, zirlaite chu an thil pawm tur leh an nun kaihruaitu atana an duhte uluk taka zir hmasa ṭhin turin a chah. B Lalchhanzova chuan, "College zirlai in nih hun chhung hi hun rangkachak, in hma hun hriltu tur a ni a, in chawr chhuahna chhungkua chu eng ang dinhmun pawh ni se, phunnawi lo u la, harsatna in tawhte chu kawng ṭha zawk zawh nan hmang thiam ang che u," a ti.