NERPC meeting-ah PE Minister a tel
North Eastern Regional Power Committee (NERPC) chu nimin khan Guwahati-a Mayfair Hotel-ah an ṭhukhawm a, Power & Electricity minister F Rodingliana leh hotu dangte an tel. Minister chuan, hmarchhak state-te'n NERPC kaltlanga power sector-a hmasawnna tur sorkar laipuia an thlente nasa zawka nawr a ṭul thu a sawi.
F Rodingliana chuan, NERPC-in Small Hydro Incentive Scheme for North East-Ministry of New & Renewable Energy (MNRE) hnuaia hydel project megawatt 24 chin siamna tur ṭanpuina pek ṭhin tihtawp tak chhunzawm tura sorkar laipuia an thlen tawh chu tun thlenga a la hlawhtlinna loh avangin nasa zawka nawr leh a ṭul thu a sawi a; Net Present Value chungchanga Central-a thlen turte pawh nasa taka bawhzui tlâng turin member-te a sáwm.
Mizoram Minister hian kumin December thlaa Mizoramin NERPC Meeting a thlen huna tel ṭheuh tur leh, Krismas vuakvet boruak Mizorama chhim turin member-te a sawm a ni.
NERPC hi India hmarchhak state pasarihte'n power supply hnianghnar an neih theih nan Electricity Act, 2003 hnuaia din a ni a; nimina ṭhutkhawmah hian, Forest Conservation Act, 1980 hnuaia forest ram tihchhiat vanga sum tam tak chawi ngai ṭhin Net Present Value chu hmarchhak state-te hmasawnna ruhrel siamnaa harsatna thlentu a nih avangin, sorkar laipuiah thlen ni se, an ti.
F Rodingliana hi Power & Electricity secretary K Lalrinzuali, superintending engineer pathum - H Lalruatkima, C Lalsawmliana leh Lalrinmawia bakah, FAO Joseph Lalzuitluanga ten an ṭawiawm a ni.