Minister-in Tuidam-Dárlâk kawng a en; Harsatna tihziaawm lailâwk nan nuai 20

Tuidam leh Dárlâk inkar kawng, hun rei tak chhe tawh chu PWD minister Vanlalhlana'n nimin khan a hmunah a tlawh a, kawng chhia vanga harsatna tihziaawm lailâwkna atan PWD-in cheng nuai 20 a pek tawh thu a sawi.

Kawng ennaah hian PWD Minister hi PWD hotute'n an ṭawiawm a, Tuidama PWD Staff Lodge-ah khawtlang hruaitute nen kawng chhe lutuk chungchang an sawiho a ni.

Minister Vanlalhlana chuan, Tuidam-Dárlâk inkar kawng chu a têt ngaihtuahin lirthei veivâk a tam hle tih a sawi a, "Tun maia harsatna tihziaawm lailâwkna atan PWD-in cheng nuai 20 a sanction tawh a, boulder nena ṭangkawpin PWD-in a thawm ṭhat hna an thawk chho ang," a ti.

Tunlaiin hmun hrang hrangah kawng chhia vangin mipuite'n harsatna an tâwk fo tih a hriat thu sawiin Minister chuan, "Hachhek tlangdungin kawng nuam leh zau zawk in nei dawn emaw tih laiin NH-44A làitu Gayatri Infrastructure hnathawh a chhiat êm avangin chawlhtir an ngai si a, kawng hluiah kal a la ngai a ni," a ti a; kawng hlui zîm takah balu phur lirthei lian ni tin 40 vel a kal ṭhin thu a sawi.

PWD Minister chuan, National Highway-44A kawng laitute nen Aizawl District Court-ah an inkhin mek thu sawiin, "He kawng laih chhunzawmna tur cheng vbc. 24 hi Ministry of Road Transport & Highways emaw, Mizoram PWD emaw account-ah a awm ngei theih nan hmalak mek a ni a, court thutlukna ngaihchân mek a ni. Court-a chinfel a nih veleh re-tender turin hmalak nghal tum a ni," a ti.

Vanlalhlana chuan, hun kal tawha thil thlengte avang leh fûrpui a nat avangin harsatna an tâwk fo tih sawiin, "Harsatnate hi thâwk leh khata tihfel duak theih ni lo mah se, theihtawp kan chhuah ve reng a ni," a ti a; kawng chungchangah theihtawp an chhuah a ni tih mipuiin hriatpui se a duh thu a sawi.

PWD Minister sawi danin, NH-44A, Lengte pêng aṭangin kawng thawm ṭhat hna kum khat chhung atan tender chhuah ṭhin a ni a, tunah hian NIDHI Creative Infrastucture-in an thawk meka. NH kawng laih vanga kawng hlui chei ṭhatna tur sum MoRTH-ah Mizoram sorkarin a dil mek a, NH-44A chawlhsan tawh pawh balance work an dil mek bawk.

Tuidam-Darlak inkar kawng chhia hi km. 6 vela thui niin, pavement concrete cement (PCC)-in km. 1-a thui siam tawh a ni a, ni tin balu phur lirthei lian 40 velin an zawh ṭhin ang a ni.