Sorkarin ruang phurhna atan cheng nuai 87.57 a seng tawh

Mizoram sorkar chuan khaw danga ruang phurh man a tumsak mekah, a kaihhnawih department Social Welfare & Tribal Affairs department chhin­chhiah danin cheng nuai 87.57 sen a ni tawh.

Vanglaini thu dawn danin, sorkarin ruang phurh man a tum ṭan September 1, 2024 aṭangin ruang 883 phurhna atan cheng nuai 87.57 sen a ni tawh. Ruang phurh a man hi a lut hmasak dan indawtin a tahtawlin pek chhuah zel a ni ṭhin.

Tun dinhmunah ruang phurh man dilna lut tawh la pek loh 118 a awm a, chuta senso chu cheng nuai 8.63 a ni. Ruang phurh man la pek lohte hi a tahtawla pek zel a ni ang.

Hetih lai hian, ruang phurh man hi online hmanga dil theih a la ni lo a, dil theih tura ṭul angte Social Welfare department-in an buaipui mek a, inremna ziah ngai angte chu ziah a ni tawh.

Mizoram sorkar chuan khaw danga ruang phurhna senso tur hian kum 2024-25 leh 2025-26 atan budget-ah cheng nuai 500 ve ve a dah a ni.