NH kawngpui a chhiat vangin oil tanker-te an tlân duh lo

Mizoram Oil Tankers Drivers' Association (MOTDA) Headquarters, Vairengte bultumin Kawnpui-Sairang inkar NH kawngpui chhe lutuk vangin tuialhthei phurtu (oil tanker)-te chu July 19, Inrinni aṭang khan an tlân duh lo.

MOTDA chuan thuchhuah siamin, Kawnpui-Sairang kawng chhia chu oil tanker tan tlan a harsa a, a him lo hle tih an tarlang a, "Kawng chhia hi tlân theih pangngaia siam a nih hma chuan July 19, 2025 aṭang hian oil tanker-te tlân rih loh ni se kan ti," an ti a; Mizoramah tuialhtheia harsatna a awm a nih pawhin mipui hriatthiamna an ngen.

Tuialhthei phurtu tanker-te an tlân loh avang hian Mizoramah petrol a váng ṭan a, filling station tam takin mipui hnena hralh tur an nei tawh lo. Petrol leh diesel free sale-na filling station-ahte chuan tuialhthei lak tum mi tam tak an intlar ṭhin a ni.