KHAWTHLIR

Himna tur zirtir

Sairang thlenga rél a luh dawn avangin Aizawl district sorkar hotute leh Northeast Frontier Railways hotute chuan July 18, 2025 khan Sairangah vantlang inkhawm, (gram sabha) an buatsaih a; fimkhur loh vanga rêl kawnga chatsualna a awm loh nan 'Railway Safety Awareness Campaign' hun hman niin, rêl kawnga mipui himna tura pawimawhte inhrilhfiah a ni.

Inzirtirna buatsaih

Assam Rifles chuan July 19, Inrinni khan Tuipanga raltlante awmna camp-ah hmeichhe naupangte himna chungchang inzirtirna 'Save Girl Child' lecture an buatsaih a, hmeichhe naupang 45 an tel. Assam Rifles hian July 18, 2025 pawh khan Siaha district-a Laki khuaah ruihhlo ṭhat lohzia leh ruihhlo laka inven dan inzirtirna an buatsaih bawk.

Hmalakna hrilhfiah

National Bank for Agriculture and Rural Development (NABARD) Foundation Day vawi 44-na pualin July 19, Inrinni khan Lunglei district-a Mausen khuaah NABARD hnuaia hmalakna hrang hrang puanzarna hun hman a ni a; 'Ek Ped Maa Ke Naam' pualin thing eng emaw zat phun nghal a ni bawk.

TB beihpui thlak

Kolasib District Senior Chief Medical Officer pisa chuan July 18, 2025 khan Saihapui K khuaah ngawr (TB) ûmbo beihpui thlakna (TB Mukt Bharat Campaign) an buatsaih. Mi 241-te hriselna dinhmun endik niin, x-ray hmangin TB vei leh vei loh enfiah a ni a, TB vei rinhlelh mi 13 hmuh chhuah a ni a; inentirte hnenah a thlawnin damdawi pek a ni.

Mi 1 chhilh hlum

Nimin zing khan Sairang Dinthar khaw hmawra National Highway kawngpui bul, Zawngte lui kawr kam quarry a chim a, in pakhat chhilhin, mi pakhat a delh hlum. Thu dawn danin, quarry chim hian HD Lalrotluanga, Hortoki a delh hlum a, nimin chawhnu lam khan a ruang lak chhuah a ni. HD Lalrotluanga hi weightlifter a ni a, Mizoram aiawh pawhin a lo khel fo tawh ṭhin niin thu dawnna chuan a tarlang.

Tuialhthei lak theih zat bithliah

Hnahthial district bawrhsap K Vanlalruati chuan thupek chhuahin, Hnahthial district-ah petrol leh diesel mamawhna a sàn avang leh mipuite'n harsatna an tawh loh nan petrol leh diesel lak theih zat a bithliah. Hnahthial DC thupeka tarlan danin, ṭum khata petrol/diesel lak theih zat chu two wheeler tan litre 3, three wheeler tan litre 5, LMV tan litre 10, MMV tan litre 20 leh HMV tan litre 40 a ni a; bûra lak phal a ni lo.