SAS-in Passing Out Ceremony hmang

School of Agricultural Sciences (SAS), Hnahthial chuan July 18, 2025 khan an auditorium-ah 'Passing Out Ceremony - 3rd Batch (2023-25)' an hmang a; Agriculture director R Lalnunzira'n hmanpuiin, pass chhuak zinga a ti ṭhate hnenah lawmpuina a hlan a, SAS hnenah Rs 10,000 a hlan bawk.

School of Agricultural Sciences, Hnahthialah hian subject 11 zirna a awm a, instructor pathum an awm. 3rd batch-ah hian zirlai 30 awmin, an vaiin an pass vek a ni.

R Lalnunzira chuan, ram leh hnam kal zelah zirna ngaih pawimawh deuh deuh a ṭul thu a sawi a, "SAS hi kan ram leh hnam tan a hlu a, kan ngaihhlut zual deuh deuh a ṭul. Instructor-te indaih lohna avangin principal leh vice-principal te pawhin ṭhahnemngai takin zirlaite an zirtir ṭhin niin ka hria a, an fakawm tak zet," a ti a; zirlaite chu hman tlak thiamna nei ngei tura intât hriam zel turin a fuih.

SAS, Hnahthial hi kum 1981 khan Integrated Training Centre (ITC) tia din a ni a, agriculture leh a kaihhnawih zirna (kum 2) kalpui niin, Basic Agriculture Training (BAT) certificate a pe chhuak ṭhin. Kum 2020 khan School of Agricultural Sciences (SAS) tiin a hming thlak a ni a, diploma course-ah hlan kai a ni.