OKM-ah a thlawna inentirna buatsaih

Central YMA, Non Government Hospital Association of Mizoram (NGHAM), Mizoram Chemist & Druggist Association, Mizoram State AIDS Control Society (MSACS) leh

National TB Elimination Programme (NTEP) te chuan July 19, Inrinni khan Operation Kingdom Ministry (OKM), Phunchawngah a thlawna inentirna (free clinic) an buatsaih.

Free clinic-ah hian NGHAM-in doctor leh nurse ṭhahnem tak thawh chhuahpuiin, OKM-a awmte hriselna dinhmun an enfiah a; MSACS-in HIV screening an tih bakah, anti retroviral therapy (ART) damdawi la mekte dinhmun an endik a, NTEP-in TB screening leh test ṭul angte an tihsak thung. Mizoram Chemist & Druggist Association lamin damdawi ṭhahnem tak an thawh bawk.

OKM-ah hian mi 380 enkawl mek an ni a, thawktu mi 44 an awm a ni.

Free clinic hawnna inkhawma thusawitu CYMA treasurer Roneihthanga chuan, Mizo mipate ṭan a ngaihzia sawiin, ruihhlo bâwiha tâng tawh lo tur leh, hun ṭha an neihte bawlh pelh lo turin OKM-a awmte a chah.