PWD Minister-in kawng siam mek a en

PWD minister Vanlalhlana chuan July 19, Inrinni khan Mamit leh Bairabi inkar kawng siam mek te, Bairabi khaw chhunga kawngpui thlúr li (four lane)-a siam mek te, Bairabi rêl chawlhhmun leh Bairabia Food Corporation of India kudam te tlawhin a enfiah.

Vanlalhlana chuan, Mamit leh Bairabi inkar kawng chu district pahnih inkalpawhna leh ei leh bar châwk luhna kawng pawimawh tak pakhat a nih avangin thawm ṭhat ngai laite thawm ṭhat vat a ṭul thu a sawi a, "Chak zawka siam a nih theih nan sorkar chuan hma a la mek a ni," a ti.

Bairabi khaw chhunga NIDHI Creative Infrastructure-in kum 2024 aṭanga National Highway-06 thlûr li tura zauh hna an thawh mek a enfiahnaah Minister hian Land Owner's Association hruaitute a kâwm nghal a; Bairabi khaw chhung kawng siam meka harsatna awmte sutkian dan tur leh zangnadawmna chungchanga harsatnate chinfel dan tur sawiho a ni.

PWD Minister hian Bairabi-a FCI kudam tlawhin, thawktute nen an inkâwm a; Bairabi rêl chawlhhmun leh a chhehvel a enfiah bawk.

Minister hi Bairabi SDO (Civil) Chinlianmanga, PWD (Highway) chief engineer Robin Lalrinawma, PWD (NH Division-I) executive engineer PC David Lalrin-liana leh NIDHI Creative Infrastructure hotute'n an ṭawiawm a ni.