Raltlante chhinchhiah dan tur zirho

Lunglei District Committee on Myanmar & Bangladesh Refugees chuan July 18, 2025 khan Lunglei SP pisaa Police Computer Training Centre-ah Myanmar leh Bangladesh aṭanga raltlante khawl hmanga an nihna finfiah theihna tura chhinchhiah dan tur zirhona, 'Training on Foreigners Identification Portal & Biometric Enrolment' an buatsaih.

Tarlan danin, Lunglei district-ah hian ram dang aṭanga raltlante chhinchhiahna kalpui turin biometric enrolment team 10 siam a ni a, hmanraw mamawh belhte Home department-ah dil mek a ni. Raltlante chhinchhiahna hi July 2025 chhungin ṭan tum a ni a, Lunglei Ramthar Venga camp chu bul ṭan nan hman tum niin, refugee camp dang pariatah tih zui a ni ang. Raltlan camp pawna awmte chhinchhiah dan tur pawh ruahman mek a ni bawk.

Training hi SDC Lalnunchhani Hnamte-in a kaihruai a; additional SP K Beihmotaosa-a'n raltlan chhinchhiah chungchanga hmalak tawhna leh hmalak zel dan tur a sawifiah. Raltlante chhinchhiah tura din enrolment team member 27 telin, master trainer CZ Lalnilianpuia leh C Lalremruata ten hriat tur ṭulte an zirtir a, zawhna leh chhanna hun hman a ni.