Kawng chhia ni 2 chhunga siam ṭan loh chuan mipui hnatlang koh tum

Joint Civil Society of Mizoram (JCSM) chuan Kawnpui leh Sairang inkara NH kawngpui lirthei tlan hleih theih loh khawpa chhe zual laite chu ni hnih chhunga siam turin thuneitute an phût a; ni hnih chhunga siam ṭan a nih loh chuan kawng siam hnatlang koh an tum thu an puang.

JCSM-ah hian Mizoram Transformation Movement (MTM), Centre for Environment and Social Justice (CESJ), Mizoram First (MF) leh Citizens Alliance for Truth and Justice (CATAJ) te an tel. July 19, 2025 khan Kawnpui-Sairang kawng a hmunah an enfiah a, mi hrang hrang an kâwm a; an hmuh dan, rawtna leh an phûtte chu nimin khan Aizawl Press Club-a press conference-ah an puang.

JCSM hian nimin khan National Highways & Infrastructure Development Corpo­ra­tion Limited (NHIDCL) hmunpui Delhi-ah lehkha thawnin, Kawnpui-Sairang kawng chu darkar 48 (ni hnih) chhunga siam ṭan ngei turin an ngen a; darkar 48 chhunga siam ṭan a nih loh chuan mipui hnatlang koh an tum a ni. Darkar 48 chu July 23, Nilaini chawhma dar 11-ah a tàwp dawn thu an sawi.

Ministry of Road Transport & Highways (MoRTH), NHIDCL leh Mizoram sorkar te chu Kawnpui-Sairang inkar kawng chhia siam a nih theih nan rang taka hma la turin an ngen tih JCSM hruaitute chuan an sawi a, "Kawng ṭha neih hi mipui chanvo (Fundamental Rights) tura India Danpui Article 21-in a tih a ni tih hria a, mipui chanvo min pe turin kan phût a ni," an ti.

JCSM convener Lalbiakmawia Ngente chuan, Kawnpui-Sairang inkar km. 40 vel chu a chhe hle tih a sawi rualin, lirthei tlân harsa khawpa chhia chu belhkhawmin km. 1 vel chauh a nih thu a sawi a, "Heng hmunte hi rang takin NHIDCL hian an siam tur a ni," tiin, an siam hun chhung tur leh an siam zawh hun tur thlengin mipui hriattir tura an phût thu a sawi.

Tlân harsa khawpa kawng chhe zual lai hmun ruk velah a awm thu sawiin JCSM hruaitute chuan, "Hetianga siam tur hian thil harsa lutuk niin a lang lo a, ni tam pawh a ngai loin a lang. Kawng hi mâm leh hnûm turin tu mahin an beisei lo a, kal theiha siam erawh mi zawng zawng beisei a ni," an ti.

JCSM hruaitute chuan, Kawnpui-Sairang inkar kawng July 19, 2025-a an enfiahnaah kawng chhia siama hna thawk hmuh tur an awm loh thu te, kawng chhe lutuk vangin lirthei za tél tangkhang a awm thu te, hun rei tak chhung ei leh in tur mumal nei loin lirthei enkawltute an awm tawh thu te, Khamrang mipuiin ni tin mamawh leh damdawi lamah harsatna an tawh phah nasat thute an sawi bawk.