Tuialhthei phurte an la tlân lo

Mizoram Oil Tanker Drivers Association (MOTDA)-in Kawnpui-Sairang inkar kawngpui a chhiat lutuk avanga July 19, 2025 aṭanga oil tanker-te an tlantir loh chu an la chhunzawm zel.

Vanglaini palai zawhna chhangin MOTDA hruai­tute chuan, PWD Minister-in a biak tawh thu an sawi a, "PWD Minister hnenah hian kan thil phût, tlan pangngai theiha kawng siam a nih thu kan lo thlen. Meeting an neih tur­ah a lo sawi chhuah tur thu min hrilh. Tun din­hmun­ah chuan load lâk rih loh chu kan dinna a la ni," an ti.

MOTDA hruaitute sawi danin, vawi khat load an lakin an tanker-in a tuar nasa a, Rs 4,000-5,000 vel sênga siamṭhat a ngai ṭhin. Chuvangin, tun dinhmunah chuan tuialhthei phura kalna chi-ah an ngai lo. MOTDA-ah hian oil tanker khalhtu 200 chuang an awm a, an inthurual a, load lak tum an awm lo.

Hetih lai hian kawng chhiat vanga tangkhang, load la hman tawh Mizorama awm eng emaw zat chu filling station-ah an thleng thei a; hei vang hian filling station ṭhenkhat chuan mipui hnena hralh tur tuialhthei an neih phah a ni.

MOTDA hian July 18 khan thuchhuah siamin, "Kawnpui-Sairang kawng chhia hi oil tanker tan tlan a harsain a him ta lo hle a, kawng chhia hi tlan theih pangngaia siam a nih hma chuan July 19 aṭang hian oil tanker-te tlan rih loh ni se," an ti a; tuialhtheiah harsatna a awm a nih pawhin hrethiam turin mipui an ngen.