CM-in Mizo DiasporaHub a hawng

Chief minister Lalduhoma chuan nimin khan Aijal Club-ah Mizoram pawn hmun hrang hranga awm Mizote inthlun zawmna tur Mizo DiasporaHub a hawng. CM chuan, ram hrang hranga Mizo awmte chu an awmna ram dante zâwm tur leh Mizo ram leh hnam timawitu nih tum turin a chah.

Mizo DiasporaHub hi Mizo Diaspora Cell leh LushAITech ṭang dunin an siam a ni a, hmun hrang hranga cheng Mizote inthlun khawmna tur internet portal a ni. Portal hi Playstore leh Appsstore-ah lak (download) theih a ni a, website mizoram.diasporahub.in aṭanga luh theih a ni bawk.

CM Lalduhoma chuan, ZPM sorkarin an intiam angin kalphung thar an siam tam tawh nia sawiin, "Chu'ng zingah chuan tunlai thiamna hmanga mipui leh sorkar indawr tawnna lam a tam. Kan ṭhalai vâk chhuakte fimkhur u la, mawi takin khawsa u la, in awmna ram dante zah takin lo zâwm ang che u. Mahni awmna hmun apiangah kan hnam timawitu nih tum zel ang u," a ti a; Mizo DiasporaHub chu ṭangkai taka hmang turin a chah.

Lalduhoma chuan, Mizo DiasporaHub-ah registration ti vek tur leh ṭangkai taka hmang tura hmun hrang hranga Mizo welfare/association-te chahin, "Inhre tawnin awm ila kan duh. Ṭanpui kan ngaihnaah kan thawkho ang a, sorkar thilte kan inhrilh bawk ang. A bik takin in awmna rama harsatna tawk, sorkar inrawlh a ṭulna thilah a ṭangkai zual dawn a ni," a ti a; Mizo DiasporaHub-ah hian welfare-te'n an inrelbawlnaa an ṭangkaipui theih tura ngaih thilte dah tel a nih thu a sawi.

Chief Minister sawi danin, ZPM sorkarah thiamna hmanga mipui leh sorkar indawr tawnna atan Mipui Aw - Public Grievances & Redressed Mechanism te, mipuite'n awlsam taka Land Revenue & Settlement an dawrna e-Ram app te, Civil Hospital, Aizawlah online-a OPD card lak theihna e-OPD te, sorkar hnathawkte attendance lakna Kai app te, Mizorama khaw tin SDG dinhmun en theihna SDG Dashboard te, sorkarin hmasawnna hna a thawhte vilna tur MPLAN app te, ILP online leh e-office leh filing system-te kalpui a ni. CM Office-ah awlsam zawka document dahṭhat leh hai chhuah theihna cloud based filing system hman a ni bawk.

Diaspora Cell chairman Vanlaldina Fanai chuan, Diaspora Cell chu June 11, 2024-ah din a nih thu a sawi a, "A tir lamah chuan ram pawna awm Mizo harsatna tâwkte chhan chhuah kha kan hna hmasa a ni. Dan ang taka ram danga an kal hi chuan harsatna an tawh pawhin hmalak a nuamin a awlsam ṭhin a, dan bawhchhiaa an kala man an nih hian hmalak a har em em ṭhin," a ti.

Mizo DiasporaHub

• Welfare/association tan registration hawn mek a ni a, chumi zawhah mimal registration hawn leh a ni ang.

• Portal hmangin miin a vah chhuahna hnaivaia Mizo welfare/association awmte awlsam takin a hre thei dawn.

• Welfare/association-te inkhawmna hmun te, pawl hruaitute biakpawh theihnate hriat theih a ni.

• Artificial intelligence hmanga thuam a ni a, zawhna zawh theih a ni.

• Rîkrum thila thu inthawnna tur SOS dah a ni.

• Portal hi LushAITech-in an enkawl zui dawn a, tihchangtlun zel a ni ang.