Sawhthing sâwngbâwlna din duh company pali thuneitute'n an pawm

Chief minister Lalduhoma kaihhruai Empowered Committee on Investment chuan nimin khan Mizorama sawhthing sâwngbâwlna (processing unit) din tuma dilna thehlut zinga company pali an pawm. Company pali hian sawhthing processing unit din nan cheng vbc. 55.45 vel hman (invest) an inhuam a ni.

Empowered Committee on Investment ṭhutkhawmah hian adviser to CM (Finance) TBC Lalvenchhunga, adviser to CM (Handholding) Dr KC Lalmalsawmzauva, chief secretary Khili Ram Meena, CM secretary Vanlaldina Fanai leh member dangte an tel.

Tarlan danin, company-te inbunna tur chungchang tihfel kim a la ni lo deuh a, rang zawka thutlukna siam a nih theih nan Special Investment Committee din a ni. Committee hian company-te be chungin an inbunna tur hmun te, draft MoU te, company-te'n sorkara mamawh an neih - ram, kawlphetha leh tui chungchang thlengin an bawhzui ang.

GINGER PROCESSING UNIT DIN TURTE

• Sjar Consulting Pvt. Ltd. Noida, UP: Cheng vbc 38 thleng invest thei turin an insawi a, mi 200 aia tam chhawr thei turah an inngai.

• Opickpure Organic Pvt. Ltd. Kangra, Himachal Pradesh: Cheng vbc 2.5 sênga bul ṭan theiin an insawi a, thawktu mi 50 vel thleng chhawr thei turah an inngai.

• AV Biotech, Bikaner, Rajasthan: Cheng vbc 13. 95 vel hman an inhuam a, mi 100 vel chhawr thei turah an inngai.

• Lushai Organic, Mizoram: Cheng vbc 1 vel hman an inhuam a, mi 20 vel chhawr thei turah an inngai.