Mizo Territorial Army lak turah pre-recruitment screening ṭan

Mizo Territorial Army, Aizawl company pre-recruitment screening chu nimin khan Lammualah ṭan a ni a; Mizorama sport association-te chu infiammi, sipaia ṭang theite hming thehlut tura ngen an ni.

Nimina screening-ah hian Assam Regimental Centre (ARC), Shillong aṭanga shortlisted candidate an neih infiammi 25 an tel a, an document leh hriselna endik a nih bakah, infuihna leh hriat tur pawimawh inhrilhfiah a ni. Screening hi August 11, 2025 aṭanga Shillong-a Assam Regiment lak tura inpuahchahna a ni nghal bawk.

Sorkar thuchhuah tarlan danin, tun hnai khan Sports & Youth Services minister Lalnghinglova Hmar leh Assam Regimental Centre (ARC), Shillong commandant Brig. Vikas Rai Shandilya an inkâwm a; sport quota-a Mizo ṭhalaite sipaia an luh dan tur leh Boys Sports Company, ARC, Shillong-a Mizo naupang an luh dan turte an sawi dun.

Sports Minister leh Assam Regiment hotu inbiakna bawhzui hian Sports & Youth Services department leh Mizoram State Sports Council kaltlangin Mizorama sport association-te chu infiammi, sipaia ṭang theite zawng chhuaka an hming thehlut tura ngen an ni.