KHAWTHLIR

Hulhliap SCC thawh 2-na ṭan

Social Welfare department, Mizoram Police, Excise & Narcotics department, Central YMA leh kohhrante buatsaih Hulhliap Short Stay Centre thawh hnihna chu nimin khan Synod Revival Camping Centre, Neihbawihah ṭan a ni a, ruihhlo ngai mipa hlir 550 vel an lut. Hulhliap SCC-a lut turte chu CYMA Hall-ah fuihna hun hmanpui hmasak a ni a, Aizawl SP Rex Zarzoliana leh Excise & Narcotics joint commissioner Peter Zohmingthanga ten fuihna thu an sawi. Transport department-in bus eng emaw zat an thawh a ni.

Tui pump khaihlak

July 19, 2025 zan aṭanga Tlawng lui tui a nut nasat avangin Greater Aizawl Water Supply Scheme (GAWSS) Phase I leh II hmangin July 20, Pathianni thleng tui pump a ni lo a, nimin zing dar 8 aṭangin tui pump leh ṭan (single pump-in) a ni. Hei vang hian Aizawlah tui sem a khaihlak tih sawiin PHE department chuan, hrethiam turin mipui an ngen.

Siahaah rate tichhuak

Siaha district transport officer Dr Manesia Khaimeichho chuan hriattirna chhuahin, driving license, vehicle registration leh permit bakah, transport kaihhnawih thil dang diltute tihsak man (rate) hman tur a tichhuak a; chiang lehzuala hre duh emaw, sawiselna/complaint emaw nei tan Siaha DTO-ah pisa hun chhungin zawhfiah theih a nih thu a tarlang. Rate siam hi langtlang taka tih a nih theih nan leh, diltute dikna humhalh a nih theihna tura tihchhuah a ni.

AR-in meizial man

Assam Rifles chuan an thu dawn bawhzuiin nimin khan Tlangsam ram dep Ṭiau lui bul vel an dap a, ram dang meizial báwmpui (case) 52 an man a, cheng nuai 67.60 hû a ni. Foreign cigarette-te hi Champhaia Customs hnenah an hlan.

Harsatna awm lo

Mamit District Disaster Management Authority chu an chairman K Laltlawmlova, district bawrhsap hoin nimin khan an ṭhukhawm. Buhfai, gas leh petrol-ah harsatna a awm loh thu tarlan a ni a, sorkar thuchhuah anga phal chin zat petrol la turin mipui an ngen.