Dampa bialtu MLA Lalrintluanga Sailo vawiin chhun dar 12-ah vui a ni dawn

Dampa bialtu MLA Lalrintluanga Sailo (65), Luangmual, Aizawl chu July 21, Thawhṭanni zan dar 9 khan Max Superspeciality Hospital, Delhi-ah a thi a, a nupui Lalbiakṭhuami, a fate panga leh a tute a kalsan.

Nimin tlai dar 4 vel khan Lalrintluanga Sailo ruang hi an inah thlenpui a ni a, Lengpui Airport-ah MLA eng emaw zatin an lo hmuak. Vawiin chhun dar 12 hian Luangmual Presbyterian Kohhran Centenary Hall-ah vui a ni ang.

Lalrintluanga Sailo hian taksaah harsatna a neih avangin June 29, 2025 khan Delhi panpui a ni a, Max Hospital-ah ni khat ward-a a awm hnuah ICU-ah dah luh a ni. Rannung seh natna (scrub typhus) leh pneumonia a nei tih hmuh chhuah a ni a, ni 20 chuang ICU-a enkawl a nih hnuah July 21 zan dar 9 khan a thi a ni.

Lalrintluanga Sailo ruang hi Delhi-a Mizote'n an buaipui a, Assembly speaker Lalbiakzama, Home minister K Sapdanga, Mizoram MP pahnih K Vanlalvena leh Richard Vanlalhmangaiha ten an ṭawiawm. Thawhlehni zan zanlai vel khan Home minister K Sapdanga hoin amah thlahna hun tawi hman a ni.

June 13, 1960-a piang Lalrintluanga Sailo hian kum 16 mi a nih lai, 1976 khan Mizo National Front underground a zawm a, second lieutenant a ni hman a; MNF rammut tàwp thleng awmin, kum 1986-a Peace Accord ziah hnua rawn chhuak zingah a tel.

Kum 2018 leh 2023-a Mizoram Legislative Assembly inthlanpuiah Dampa bial aṭangin MNF ticket-in MLA atan thlan tlin a ni a, MNF sorkar lai 2018-2023 chhung government deputy chief whip a ni. MNF party-a mi pawimawh a ni a, MNF National Core Committee-ah member a ni mek. Luangmual Village Council member atan ṭum li thlan a lo ni tawh bawk.