MZP-in kawngpui thawm ṭhat an phût; July thla chhung NHIDCL ngaichâng dawn

MZP hruaitute chuan nimin khan Aizawl Press Club-ah thuthar thehdarhtute an kâwm a; Bilkhawthlir-Kolasib leh Kawnpui-Khamrang inkar national highway kawngpui chhe zual laite thawm ṭha vat turin NHIDCL an phût a, July thla chhung NHIDCL hmalak dan an ngaichâng dawn tih an puang.

MZP president H Lalthianghlima chuan, MZP Federal Council-ah 'NHIDCL hnathawh hi a ṭhat tawk loh ṭhin avangin MZP-in a ṭhat zawk theih nan hma la chhunzawm zel rawh se' tia an rêl thu sawiin, "Kawngpui an thawm ṭhat dan July thla chhung kan en zui dawn a, an thawh ṭhat loh chuan a ṭul angin hma kan la ang," a ti a; Mizorama NHIDCL office pawh kalh mai ṭha an tih thu a sawi.

H Lalthianghlima chuan, July 17, 2025 khan kawng chhia chungchang chu Mizorama NHIDCL hotu ber executive director Virendra Jakhar sawipui an tum thu sawiin, "Chawlh a lo lak avangin kan hmu thei lo. Mizoram ei leh bar lak luhna kawngpui pawimawh em em, lirthei tlân hleih theih loh khawpa a chhiat laia August 7, 2025 thleng chawlh a lo la daih hi hriatthiam har kan ti hle," a ti.

MZP President chuan, "Mizo mipui min hmusittu NHIDCL Executive Director hi Mizorama awm tlaka kan ngaih loh bakah, a deputation term a tawp tawh avangin a term pawhsei kan remti lo," a ti a; Virendra Jakhar chu Mizorama lêt tawh lo turin MZP-in an chah tih a sawi.

Bilkhawthkir-Kolasib (km 70-95) leh Kawnpui-Khamrang (km 118-133) chu Mizoram PWD-in March 26, 2025 khan NHIDCL hnenah an hlan tih sawiin Lalthianghlima chuan, "Tun July thla chhung ngeia an enkawl kawngpui chhe zual lai lirthei kal theih tura thawm ṭha vat turin NHIDCL kan phût a, an hmalak dante uluk takin kan vil dawn bakah, a ṭul angin kan bawhzui zel dawn," a ti.