Police-in Polytechnic ram neitu an man; Ram neituin FIR a thehlut ve leh nghal

Mizoram Polytechnic, Lunglei (MPL) Principal-in Lunglei Police Station-a FIR an thehluh bawhzuiin Lunglei police-te chuan July 21, Thawhṭanni zan tir lam khan MPL ram neitua inchhál Vanlaldawngliana s/o Sporta (L), Theiriat chu an man. Vanlaldawngliana hian July 21 zan vek khan police-ah FIR a thehlut ve nghal bawk.

Vanlaldawngliana'n August 31, 2018-a periodic patta tihnun (renew) a dilnaah kum 1979-a thi tawh a pa Sporta hming ziak (signature) a awm nia hriain MPL Principal chuan July 19, 2025 khan Lunglei PS-ah FIR a thehlut a ni.

MPL Principal-in FIR a thehluhah hian Lunglei police-te chuan thubuai ziak lut nghal mai loin, an zir chiang phawt a; an zir chian hnuah thubuai an ziak lut a, July 21, 2025 zan khan Vanlaldawngliana, Lunglei Theiriat chu an man ta a ni.

Hetih lai hian, Van­lal­dawngliana hian a laka FIR thehluttu Lalnuntluanga leh a thurualpuite lakah July 21, Thawhṭanni zan khan Lunglei PS-ah FIR a thehlut ve leh nghal.

Lunglei aṭanga thu dawn danin, Vanlal­dawngliana chuan FIR-ah hian, MPL-in a ram an luah man chu hun tiam chhunga sorkarin a pek theih loh avangin court-a thubuai kal lai tihṭhuanawp tumah te, Lalnuntluanga kaltlangin amah vauah leh dik lo taka thil tia amah puhah sorkar a puh a ni.

Vanlaldawngliana chuan, a dikna chanvo hmang thei lo turin a laka FIR thehluttute'n dik lo takin tihbuai an tum nia a ngaih thu te, mi pakhat aia tamin a lakah pawi khawih tumin ruahmanna an siam nia a hriat thute a ziak bawk.