Khawvel hriat khawpa textile hub langsar kan siam theih ka ring - CM

Chief minister Lalduhoma chuan, India hmarchhak state-te an ṭanrual chuan khawvel hriat khawpa textile hub langsar takah hmarchhak bial an siam theih a rin thu a sawi.

Ministry of DoNER hnuaia din High Level Task Force on Handloom & Handicraft chu an chairman Neiphiu Rio, Nagaland chief minister kaihhruaiin nimin khan online hmangin an ṭhukhawm a; CM Lalduhoma pawh telin, chief secretary Khilli Ram Meena, secretary to CM Vanlaldina Fanai leh Commerce & Industries secretary Dr Lalzirmawia Chhangte ten an ṭawiawm.

Chief Minister chuan, India rama handloom lama hna thawk thei mihring 60% chu hmarchhak state-a awm an nih thu a sawi a, "Hei hian Handloom lama hma kan sawn zel theihzia a tichiang hle," a ti.

Lalduhoma chuan, hmalakna tur (road map) duan te, common facility centre neih chungchang te, puantahtute training pek te, state leh state inthlunzawmna siam te, hmarchhaka thil siam chhuahte quality standard pakhat hmanga branding kalpui te, skill & design lamah thil thar neih tumte ṭul a tih thu a sawi a, "Khawvel hriat khawpa textile hub langsar takah kan insiam theiin ka ring," tiin a rawt.

Online meeting-ah hian DoNER minister Jyotiraditya Scindia, Textiles minister Giriraj Singh, hmarchhak state chief minister-te leh an aiawh minister-te pawhin thu an sawi a ni.

DoNER hian India hmarchhak bialin hmasawnna kawng dik a zawh theih nan High Level Task Force pariat a din a, state bil anga hmasawnna ruahman ringawt lo a, hmarchhak bial pumpui tana ṭangkai tur, state hrang hrangte huap zo (cluster approach) duan tumin an ṭhukhawm ṭhin a ni.