KHAWTHLIR

Hnathawh enfiah

North East Council (NEC) Evaluation and Monitoring Sector official J Nicholas Kharbhih chu Mizorama NEC sum hmanga hna hrang hrang thawh mekte endik turin a rawn zin a, nimin khan Serchhip Kawlri tlanga Heritage Centre sak mek a enfiah. J Nicholas Kharbhih hi PWD leh DC Office hotute leh contractor-te'n an ṭawiawm a ni.

Hnahthial Lungleng mi leh sa ni lo

Hnahthial Lungleng Branch YMA chuan thuchhuah siamin, chief minister hlui Zoramthanga leh MLA H Lalzirliana thah tum an nih thu social media-a tarlangtua puh Chanchinmawia (49) s/o Lalawia (L) chu Hnahthial Lungleng Veng a nih loh thu an tarlang. Media hrang hrangah Chanchinmawia chu Hnahthial Lungleng Veng anga tarlan chu a dik loh thu leh, Lunglei Zohnuai a nih zawk thu an tarlang bawk.

Intuaihriamna hun

India rama university leh college zirtirtute intuaihriamna, ‘Language, Culture and Memory’ tih thupui hmanga UGC - Malaviya Mission Teacher Training Centre chu Mizoram University-ah neih mek a ni a, university leh college zirtirtu mi 25 an tel. Zirhona hi July 18, 2025 khan course coordinator Dr Zoramdinthara kaihhruaiin ṭan a ni a, chawlhkar hnih a awh dawn a ni.

Green investment

Serchhip College leh Mizoram Startup Mission chuan nimin khan Serchhip College-ah 'Awareness and Capacity Building on Green Investment programme' an buatsaih. Thupui hrang hrang hmangin Serchhip College leh Mizoram Startup Mission-a mithiamte'n zirlaite green investment chungchang an hrilhfiah a ni.

Ṭanpuina hlan

Hmar Youth Association Gen. Hqrs. Rengkai, Churachanpur, Manipur hruaitute chuan kumina Mizorama khuarel chhiatna tuarte ṭanpui nan nimin khan Central YMA-ah Rs 2,50,000 an hlan. HYA hruaitute hi ṭanpuina hlan turin an general secretary Lalramsiem Zote hoin CYMA pisaah an kal a, CYMA president Lalhmachhuana hnenah ṭanpuina sum an hlan a ni. Mizo hnam inpumkhatna chungchang an sawiho nghal bawk.