Chawngtlaiah saptheia hmalakna hawng

Horticulture minister C Lalsawivunga chuan nimin khan Chawngtlai khua Nikuala Hall-ah Mission for Integrated Development of Horticulture (MIDH) Special Intervention Scheme 2025-26 hnuaia sapthei chìn lama hmalakna a hawng.

C Lalsawivunga chuan, Khawzawl district-a sapthei chíngtute chu rim taka an thawh ṭhin thu sawiin, "Scheme hnuaia hamṭhatna dawn in phû a, sorkarin in hnathawh ṭha a hmu. Sapthei hi India ramah hralh a kal a, a chìn nan Mizoram hi hmun ṭha a nih avangin mipuite'n he hmalakna hi an hlâwkpui ngei ka ring," a ti a; rinawmna leh dikna vawng tlat turin sapthei chingtute a chah.

Sapthei hralh bakah ei tur sawngbawl lamah sorkarin hma a lak mek thu sawiin Minister chuan, "Kan hmalaknate hi kut hnathawktute hlawhtlinnaah a innghat," a ti. Minister hian sapthei chingtute hnenah neem cake/powder, NPK, wooden post leh an mamawh hrang hrang a sem nghal a ni.

Inkhawm hi Horticulture director CH Lalmuanpuia'n a kaihruai a; Chawngtlai leh a chhehvel khuaa kut hnathawktute an tel. Khawzawl bawrhsap K Vanlalṭhiana, MIFCO chairman Lalṭhazuala Rawite leh KVI Board chairman C Lalremliana ten thu an sawi bawk.

Sapthei chin

☑ MIDH, Special Intervention Scheme hnuaia hmalakna a ni.

☑ Aizawl, Serchhip, Khawzawl leh Champhai district-ah hmalak tum a ni.

☑ Khawzawl district bikah Chawngtlai, Khawhai leh Tualte khuaa mi 316 sapthei chìntir tum a ni.

☑ Scheme hnuaiah sapthei ṭiak, leiṭha, sapthei zâmna hrui leh enkawlna tur hmanrua leh damdawi pek a ni dawn.

☑ Sapthei zàmna tur banril man atan Rs 40,000 ṭheuh pek a ni dawn a, ban phun vekte chu endik hnuah pawisa pek a ni ang.

☑ Khawzawl district hi Mizorama sapthei thar tam ber a ni a, chhungkaw 200 chuangin eizawnna atan an hmang mek.