Pushpak hmalakna Larsap hrilhfiah

Project Pushpak, Border Roads Organisation (BRO) chief engineer GP Singh leh hotu dangte chuan July 21, Thawhṭanni tlai khan Raj Bhavan-ah Governor Gen.Dr Vijay Kumar Singh an hmu a, Project Pushpak hmachhawp leh rawtnate an hrilhfiah.

Governor chuan, Project Pushpak hnuaia project hrang hrang leh rawtna thlente chu pawimawh a tih thu a sawi a; chak zawka hmalak a nih theih nan central leh state sorkar thuneitue hnenah a ṭul anga bawhzui a, approval leh funding a awm theih nana hmalakpui a tum thu a lo a hrilh.

PROJECT PUSHPAK HOTUTE TARLAN

# Kawnpui-Durtlang-Aizawl (KDA) road tihchangtlung a pawimawh a, Ministry of Home Affairs lama fund bawhzui chak a ṭul. IMB (MHA) road work leh fencing work te ṭan thei turin a kaihhnawih ram lak leh forest clearance case-te chinfel thuai a ṭul.

# Kawlchaw-Serkawr-Tuipang kawng siam tura rawtna thlen a ni a, state sorkar aṭangin no objection certificate nghah mek a ni.

# Old Tualcheng-Pàmchung kawng siamna tur sum sanction tawhah state sorkar aṭangin KDA road nena inthlakthleng awm lo tura NOC ngaihchan a ni a, DC aṭangin hna thawh phalna dil a ni.

# Kaladan Multi Modal Transit Transport Project hnuaia package, 71 RCC (GREF), Lawngtlai thawh tura pek chu chuan hna a tichakin vilzui a tiawlsam dawn.

# Aizawl by-pass hnuaia package ṭhenkhat Pushpak/BRO kuta hlan chungchang.