Political party-te'n MLA Rintluanga an ui

Mizorama political party-te chuan July 21, Thawhṭanni zan dar 9-a thi Dampa bialtu MLA Lalrintluanga Sailo an ui thu leh a kalsan tâk a chhungte Pathianin awmpuiin thlamuan se an duh thu thuchhuah siamin an tarlang.

MNF chuan, Lalrintluanga Sailo chu kum 16 chauh a ni lai, kum 1976-ah MNF zawmin hnam sipaiah a ṭang a, inremna thuthlung ziah thlenga awmin, second lieutenant a kai hman tih an tarlang a, "Overground politics-ah MNF tan ṭhahnem ngai taka thawkin nihna hrang hrang a chelh a, tunah National Core Committee member a ni mek," an ti.

Lalrintluanga Sailo chu ram leh hnam tan leh a bial tana theihtawp chhuahtu a nih thu sawiin MNF chuan, "Hun lo taka kan chân hi kan ui tak zet... MNF ban pui rinawm a tliak ta a ni," an ti a; a kalsan a nupui leh a tu leh fate Pathianin awmpui se an duh thu an tarlang.

Rorel lai ZPM party chuan Lalrintluanga Sailo sûnna thu social media-ah an tarlang a, "MLA vawi hnih tling zawn theiin hetia hun lo taka min boralsan hi kan ui tak zet. A kalsan tak a bial chhung mipui leh a nupui fanaute Pathian thlamuannain a awmpui tlat kan duh e," an ti.

Mizoram Pradesh Congress Committee chuan press release siamin, "Pa ṭha tak, ram rawngbawlnaah tih tak taka thil ti ṭhin a ni. Mi thil phal, a bialte tana a ṭha ber duhtu a ni a, a bial mipui bakah Mizoram mipui ngainat rawn a ni. Min boralsan mai hi ram leh hnam tan chànna nasa tak a ni. A nupui fanau leh chhungte kan tawrhpui tak zet a, Pathian thlamuanna leh awmpuina kan dilsak e," an ti a; Lalrintluanga Sailo a thi chu pawi an tih thu leh an ui thu an tarlang.

BJP, Mizoram Pradesh chuan, Lalrintluanga Sailo chu an ui thu tarlangin, "MLA term hnih ni thei, VC-ah pawh term li tling thei, khawtlang rawngbawlnaa inhmang tak a ni a, pa ṭha leh thil ti tak tak mi a nihzia a lang. Mizoramin MLA ṭha tak kan chán hi a pawi kan tiin, MNF party leh a chhungte kan tawrhpui tak zet zet. Thlamuang takin châwl se, a nupui fanaute Lalpa'n awmpui se tih hi BJP Mizoram ṭawngṭaina a ni," an ti.