Mizoramah Wai Wai siamna din tum

Wai Wai siamtu Chaudhary Group hotute chuan nimin khan Aizawl Press Club-ah thuthar thehdarhtute an kâwm a; Mizoram chu India rama Wai Wai hralh tam lamah pathumna a nih thu leh, Mizoramah Wai Wai siamna factory din tumin ngaihtuahna an neih thu a sawi.

Chaudhary Group managing director Varun Chaudhary chuan zawhna chhangin, Mizoramah Wai Wai an hralh tam hle tih a sawi a, "Assam-ah kan hralh tam ber a, West Bengal-in a dawt a, Mizoram hi pathumna a ni," a ti.

Chaudhary Group hotute chuan, Mizoramah Wai Wai distributor 16 an neih thu sawiin, "Noodle hrang hrang hralh a awm a, Mizorama noodle hralh zawng zawng zingah 50% chuang chu Wai Wai a ni," an ti a; Mizoramah kum 30 chuang Wai Wai an hralh tawh thu leh, Mizoram mipui chungah an lawm thu an sawi.

Mizoramah Wai Wai siamna factory din an tum leh tum loh zawhna chhangin Varun Chaudhary chuan, "Aizawl thlengin rel a tlan dawn hnai tawh a, rel a tlan chuan hmanrua leh bungruate lak luh a awlsam tawh dawn a, hei vang hian Mizoramah tlant (factory) din dan tur kan ngaihtuah," a ti a; India ramah Wai Wai siamna factory pasarih an neih tawh thu a sawi a ni.