Minister-te'n college ram an enfiah

Higher & Technical Education minister Dr Vanlalthlana, Commerce & Industries minister F Rodingliana leh Rural Development & Administration minister Prof. Lalnilawma te chuan nimin khan Aizawl North College ram leh a ṭhenawm ramte an enfiah.

Aizawl North College (ANC) hian anmahni building bakah an ṭhenawma Commerce & Industries bazar hmun an luah tel a; zirlai an pun zel avang leh college hmunhmain a dâwl zawh tawh loh avangin harsatna an tâwk chho mek. Harsatna chingfel turin July 16, 2025 khan joint meeting neih a ni tawh a, chumi bawhzui chuan nimin khan a hmunah minister pathumin an tlawh a ni.

Minister-te hi RDA secretary R Zarzosanga, Commerce & Industries secretary Dr Lalzirmawia Chhangte School Education special secretary David Lalthantluanga leh department official dangte bakah, Ramhlun North Local Council member-te'n an ṭawiawm.