Minister-in HBC fresher social a hmanpui

Hrangbana College (HBC) chuan nimin khan Vanapa Hall-ah zirlai tharte lawmna leh zirlai ti ṭhate chawimawina, Fresher Social & Felicitation an hmang a, minister of state B Lalchhanzova'n hmanpuiin, college annual magazine 'Herhse' a tlangzarh.

B Lalchhanzova chuan, HBC-in undergraduate result ṭha tak a nei chu a lawmpui thu sawiin, kum dangah result ṭha tak nei zui zel tum turin a chah a, "Zirlai tharte'n lehkha in zir chhoh zelna turah tuna in dinhmun mek aia ṭha hai chhuak turin theihtawp in chhuah a ngai. Hma lam êng tak in nei a, in chak lohna aiin in chakna lai hmu lian zawk zel turin ka duh che u a ni," a ti.

College an kal chhan chhût chiang tura zirlaite chahin B Lalchhanzova chuan, "Zir nasa em em phawt mai rawh u. Tih tak takna nena lehkha in zir hi kan ram hian a mamawh. Zirtirtute leh zirlaite hi inzirtir tur bik kan awm lo, thawkho tur zawk kan lo ni," a ti a, ram leh hnam tan theihtawp chhuah turin a sawm.

Inkhawmah hian HBC principal Lalthlengliana Hrahsel pawhin thu a sawi a, MZU UG Examination 2025-a subject hrang hranga top 10-a tlingte hnenah Hrangbana Award hlan a ni a; award dangte hlan a ni bawk.

HBC hian kuminah zirlai thar 758 an nei a, kumin MZU UG exam-ah khan pass percentage 89.91% neiin, subject pathumah topper an neih bakah, top 10-a lang zirlai 40 an nei a ni.