Zirtirtu transfer order sût phût

Vairengte Joint Village Council chuan, Vairengte Higher Secondary School-a chemistry lecturer leh principal mawhphurhna la mektu Lalhuzauva sawn chhuahna tur thupek sût turin sorkar an phût tih nimin khan thuchhuah siamin an puang.

Lalhuzauva sawn chhuah a ni chu hun lo an tih thu leh hriatthiam harsa an tih thu tarlangin Vairengte Joint VC chuan, "Zirlai naupang exam hmachhawn mek an nih laia transfer a ni hi thu­neitu lam hian ngaih­tuah nawn leh se kan duh hle," an ti.

Vairengte HSS-a chemistry lecturer sawn chungchangah thu dik tâwk lo hmanga beihna a awma an hriat thu sawiin Joint VC chuan, "Khawtlang hruaitu hming hawha hêktu awm anga thuthang a awm hi thu dik lo a ni a, khawtlang hruaitute aṭangin hêkna a awm lo," an ti.

Vairengte Joint VC chuan, "Transfer order sût ngei turin sorkar thuneitute kan ngen a, transfer order sût a nih theihna atana hmalakna awm apiang kan thlâwp dawn a ni," an ti bawk.