COVID-19: Mizoram dinhmun Hripui vei mi 9 hmuh belh a ni

December 29, Thawhlehni khan Mizoramah Covid-19 vei mi pakua hmuh chhuah a ni a, natna (Covid-19 symptom) lang chhuak an awm lo a, Mizoram chhunga hri kai pakhat a awm. Nimin khan hripui laka fihlim tawh mi pathum chhuahtir an ni thung.

Covid-19 vei hmuh thar mi pakuate chu mipa pariat leh hmeichhia pakhat an ni a; ZMC laboratory-a hmuh mi pahnih leh TrueNAT-PCR hmanga hmuh mi pasarih an ni a; Rapid Antigen Test (RAT) hmanga endik zingah hmuh chhuah a ni lo.

Thawhlehni khan swab sample 1,159 endik a ni a, ZMC laboratory-ah mi 503, TrueNAT-PCR hmangin district pariatah mi 249 leh RAT hmangin district pakuaah mi 407 endik a ni. Hripui vei mi pakua hmuh chhuahte chu sample endik zat 1,159 aṭangin 0.77% a ni.

Sorkar thuchhuah tarlan danin, ZMC-a hmuh chhuahte chu Aizawl district-a swab sample lak ve ve an ni a; hmeichhia kum 34, tualchhunga kai leh mipa kum 34, state pawn aṭanga rawn lut an ni.

TrueNAT-PCR hmanga hmuh chhuah mi pasarihte chu mipa vek, kum 18-56 inkar an ni a, Mizoram páwn aṭanga tun hnaia rawn lut, khung hran lai vek niin, symptom nei an awm lo.

Nimin khan Covid-19 laka fihlîm tawh mi pathum chu enkawlna hmun aṭangin chhuahtir an ni a; SRH-ZMC aṭangin mi pahnih leh Saitual CCC aṭangin mi pakhat an chhuak a ni.

Mizorama Covid-19 vei mi 4,199 hmuh chhuah tawhte chu mipa 3,084 leh hmeichhia 1,115 an ni a; nizan dar 8 thleng khan damin mi 4,091 (97.43%) chhuahtir an ni tawh a, mi pariat (0.19%) thi tawhin, enkawl mek mi 100 (2.38%) an awm.

December 29 thleng khan Mizoramah swab sample 1,78,546 endik tawh niin, chu'ng aṭanga Covid-19 positive hmuh chhuah tawh 4,199 chu 2.35% a ni.

Mizorama Covid-19 positive hmuh chhuah tawh mi 4,199 zinga mi 1,991 chu Mizoram chhunga kái an ni a, mi 2,208 chu state páwn aṭanga rawn lût an ni.

ZMC-a hmuh chhuah:

Vairengte - 1: Hmeichhia kum 34, tualchhunga kái, ZMC-a a fanu Covid-19 +ve enkawl mek awmpuitu, symptom nei lo.

AR, Zokhawsang - 1: Assam Rifles sipai kum 34, Silchar aṭanga tun hnaia rawn lut, Zokhawsanga khung hran mek, symptom nei lo.

TrueNAT-PCR-a hmuh:

BSF, Lunglei - 4: 199 BSF sipai kum 31, 43, 50 & 56; tun hnaia West Bengal aṭanga rawn lut, quarantine facility-a khung hran lai, symptom nei lo.

BSF, Serchhip - 1: 60 BSF sipai kum 38, tun hnaia Mizorama rawn lut, quarantine facility-a awm mek, symptom nei lo.

Serchhip - 1: Hnam dang mipa kum 18, Tantia Constructions hnuaia hna thawk, Assam aṭanga rawn lut, khung hran lai, symptom nei lo.

Hnahthial - 1: Mipa kum 35, tun hnaia Assam aṭanga rawn lut, home quarantine lai, symptom nei lo.