Chi bil rilru pu lo turin hriattir

NGO Coordination Committee (NGOCC) chuan, Zo hnahthlak raltlante chu chi bil rilru pu lo tur te, inpum­­khatna tichhe thei zawnga thil ti lo tur leh ruih­hlo tawlhah inhnamhnawih lo turin an hriattir.

NGOCC hi nimin khan Central YMA Committee Room-ah an ṭhukhawm a; thuchhuah siamin, Myanmar leh Manipur-a tualchhung buainain a nghawng kal zelah Mizoram chhunga chi bil rilru rawngkai hriat tur a awm chu pawi an tih thu an tarlang.

Joint NGO chuan, "Mizoram hi Zo hnahthlakte inlung­rual taka kan chen­hona a nih avangin rambuai vanga Zo hnahthlak raltlante chi bil rilru pu lo tur leh kan inunauna leh inpumkhatna tichhe thei zawnga ngaih-tuahna seng lo turin kan inhriattir. Mizoram chhunga sahimna zawnga raltlan awmte ruihhlo tawlh kawnga inhnamhnawih lo turin kan inhriattir bawk," an ti.