Buhfaiah harsatna a awm lo - FCSCA; Tuialhtheiah huamhauh lo turin ngen

Food, Civil Supplies & Consumers Affairs (FCSCA) department chuan thuchhuah siamin, tuialhthei chungchangah huamhauh lo turin mipui an ngen a, buhfai sem turah harsatna a awm loh thu an tarlang.

FCSCA department chuan, National Highway 06 & 306 a ṭhat loh vanga bungraw phur lirtheite'n harsatna an tawh lai leh pawl ṭhenkhatin an lirtheite tlantir loh avangin ni tin mamawhah mipuiin harsatna an tawh loh nan sorkarin theihtawp a chhuah thu an tarlang a, "Fûrpui inṭan hmain Supply department chuan ngawrh takin monsoon stocking a kalpui a, hei vang hian buhfai semah harsatna a awm lo," an ti.

Nimin zinga report an dawn chinah tuialhthei eng emaw zat a awm thu sawiin FCSCA chuan, "Tun dinhmunah Aizawl Municipal Corporation huam chhung bikah MS-1 (petrol) litre 11,729, entra premium litre 27,308 leh HSD (diesel) litre 26,871 dah khawl (stock) a awm mek," an ti a; district dangah pawh district administration hriatpuina hnuaiah tuialhthei awm zat vil reng a nih thu an tarlang.

Supply department chuan, tuialhthei chu mi dangin an mamawh ve a ni tih hriaa huamhauh fál lo turin mipui an ngen a, "Mipuite'n harsatna an tawh loh nan sorkarin theihtawp a chhuah mek zel a ni," an ti.