MLA Lalrintluanga Sailo vui a ni

July 21, 2025 zan dar 9-a thi Dampa bialtu MLA Lalrintluanga Sailo chu nimin khan Luangmuala an inah vui a ni a; Assembly House leader leh chief minister Lalduhoma, MLA leh pawl hrang hrang aiawhte'n thlahna thu an sawi.

Lalrintluanga Sailo hi nimin chhun dar 12 khan Luangmual bialtu pastor Rev. Dr F Pachhunga'n a vui a, a nupui Lalbiakṭhuami'n a chanchin a sawi. Assembly House Leader bakah, deputy speaker Lalfamkima, MNF Legislature Party leader leh Opposition leader Lalchhandama Ralte leh political party hruaituten thu an sawi a ni.

House leader Lalduhoma chuan, Lalrintluanga Sailo chu Mizorama MLA ni lai thi 10-na nia a hriat thu a sawi a; Assembly session-a a thusawi hnuhnungte a en lêt a, a lung a lêng hle tih sawiin, "A nupui fanaute lo thlaphâng lo u la, ṭhian ṭha tam tak in nei tih hria ang che u. Sorkarin a tih theih apiang a ti dawn a ni," a ti.

Lalduhoma chuan, "Pu Lalrintluanga Sailo hi legislator ṭha, debater ropui tak a ni. Ka nau a ni a... kan inngaina em em. Session-a kan han che velte hi mi inhal tak emaw min ti mai thei a, mahse, a ni lo, kan innêl em em a ni," a ti a; Lalrintluanga Sailo chu kum 1993-a MLA inthlana Bilkhawthlir biala a din laiin a campaign chairman a nih thu a sawi.

Deputy speaker Lalfamkima chuan, Lalrintluanga Sailo chu pa ṭha, mi khawngaih thei leh nèlawm tak a nih thu sawiin, "Ram tana a ṭhahnemngaihnate kan hre reng dawn a, a tel loa Assembly House kan kalpui tur hi ka huphurh hle," a ti. Lalfamkima hian Delhi-a awm mek speaker Lalbiakzama'n a thlahna thuchah a sawi bawk.

MNF Legislature Party leader Lalchhandama Ralte chuan, Lalrintluanga Sailo chu MNF Legislature Party deputy leader a nih thu a sawi a, "Kan party chhungah leh party dang kan ṭhiante nena kan inpawh tawnna kawngah a thawh hlâwk hle a, kan ngaina vek a ni. Lehkha zir sang tia sawi tlak ni lo mah se, mifing a ni," a ti.

Mizoram Assembly Secretariat additional secretary Lalthangmawia'n Mizoram sorkarin Lalrintluanga Sailo a sûnna thuchhuak (gazette) a chhiar chhuak a; Assembly House-a thu a sawi zatte a tarlang bawk.