Mizoramah radar bun thuai turin Governor-in IMD Director a chah

Governor Gen. Dr Vijay Kumar Singh chuan Meteorological Centre, Aizawl (India Meteorological Department) director Sudheer Kumar Dwivedi chu Mizoramah radar bun thuai turin a chah.

Gen. VK Singh leh Sudheer Kumar Dwivedi te hi nimin khan Raj Bhavan-ah an inkâwm a, IMD Meteorological Centre, Aizawl hmalakna leh hmachhawpte an sawi dun. Larsap chuan, Meteorological Centre, Aizawlin July 27, 2025-ah kum hnihna hmel a hmu tur chu lawmawm a tih thu a sawi rualin, Mizoramah radar bun thuai a nih theih nana hma la rang turin a chah a ni.

Governor chuan, khaw awm dan tur hrilhlâwkna leh data pawimawh tak tak siam lama IMD Meteorological Centre, Aizawl hmalaknate fakawm a tih thu a sawi a; an hmalaknate zau zawka tihdarh zung zung a nih theih nan sorkar department-te leh media-te zau zawka thawhpui tur leh, Mizo mipuite'n ṭangkai taka an chhawr theih nan Mizo ṭawng ngeia tarlan tum turin a chah bawk.

Sudheer Kumar Dwivedi hian Meteorological Centre, Aizawl an hmalakna leh hmachhawpte a sawifiah a; Meteorological Centre, Aizawl tichangtlung tura hmalaknaah Larsapin a thlàwp ṭhin avangin an lawm thu a sawi.

Meteorological Centre, Aizawl Director tarlan danin, VVIP-te Mizoramah an rawn zinin an kalna tur hmuna khaw awm dan tur hrilhlawkna an siam ṭhin a; ni sarih chhung zel atan Mizorama khaw awm dan tur hrilhlawkna an siam ṭhin. Khualzin hîp nana Aizawl Air Quality Index an siam a, Mizorama khualzinte kal tamna hmun palia khaw awm dan tur hrilhlawkna (tourist places forecast) bakah, darkar 6 kal ta chhunga khaw awm dan kimchang an website leh social media-ah an tarlang ṭhin bawk.

Meteorological Centre, Aizawl hian kumin chhungin Mission Mausam hnuaia Laipuitlangah Doppler Weather Radar bun an tum a; Mizorama cyclone tleh ṭhin zinga 90% chu chhim lam aṭanga thawk a nih avangin Siahaah Meteorological Office bun an tum bakah, zirlaite tan Aizawl Meteorological Centre-ah Training & Awareness Centre din an tum.

Nakin zel atana inruahman lâwk nan Aerodrome Meteorological Station (ASM), Lengpui chu tun aia a changtlung zawk turin Aerodrome Meteorological Office-ah hlan kai an tum bawk.