Kut hnathawh a hlâwk zel dawn - Horticulture Minister

Horticulture minister C Lalsawivunga chuan nimin khan Champhai district-a sapthei ching thar turte tana Champhaia Enviroment, Forest & Climate Change conference hall-a buatsaih 'Sapthei chin khuhhawnna' a hmanpui a; kut hnathawh a hlâwk zel dawn thu a sawi.

Sapthei chin khuhhawnnaah hian sapthei chingtute hnenah an hman ṭangkai tur bungrua sem hmahruai atan chhungkaw panga hnenah pek a ni a; Champhai district-ah hian sapthei ching tura thlan chhungkua 139 an awm a ni.

Horticulture Minister chuan, Mizoram mipui an la thatchhe lo nia sawiin, "Mi tam zawk hian hna kan la thawk tak tak a ni. Kan sorkar hnuah pawh khaw hrang hrang ka fang hnem ve tawh viau a, Mizote hi hna thawk nasa tak kan ni tih ka hmu a ni," a ti a; kut hnathawktute'n hna an thawh nasat ang hûin hlâwkna an têl loh ṭhin thu a sawi.

C Lalsawivunga chuan, kalphung thar sorkarah kut hnathawktute lam hawiin sorkar a che nasa nia sawiin, "Mizoramah sorkar a lo awm fo tawh a, hetiang taka kut hnathawktute ngaihsak sorkar ka la hmu lo. Kut hnathawktute pawh kan taima chho tulh tulh dawnin ka hria, sorkar a ṭang bawk a, hetiang zela kan kal chuan kut hnathawh hi a hlawk zel dawn a ni," a ti.

Minister hian thlai leh thei chinte'n Pathian malsawmna an dawn theih nan zu leh ruihhlo dang lakah fihlim turin kal khawmte a chah a; Champhai lama hun a hman turte chu ṭhulh mai theih a nih tawh si loh avanga MLA Lalrintluanga Sailo vuinaa a tel thei lo chu hrehawm a tih thu leh, a nupui fanau leh ram rawng a bawlpuite hriatthiamna a ngen thu a sawi bawk.

Horticulture Minister hian Hmunhmelṭha leh New Champhaia thlai dah khawmna tur sak tharte a hawng bawk a; Hmunhmelṭhaa mi chu Rs 52,20,000 senga sak niin, New Champhaia mi chu Rs 1,14,64,000 senga sak a ni. Champhai Grape Grower Society hotute leh grape chingtute nen Champhai Winery-ah hmasawn zel dan tur an sawiho bawk a ni.