Mizoram NH kawng chhia chungchang Lok Sabha MP-in NHIDCL hotu a sawipui

Lok Sabha MP Richard Vanlalhmangaiha chuan July 22, Thawhlehni tlai khan National Highways and Infrastructure Development Corporation Limited (NHIDCL) managing director Dr Krishan Kumar chu New Delhi-a a pisaah a kâwm a, Mizorama NHIDCL kawng siam chungchanga harsatnate a sawipui.

Richard Vanlalhmangaiha chuan, Mizorama NHIDCL-in national highway an enkawl, NH-306 leh NH-06 a chhiat lutuk vanga Mizoramin harsatna a tawh nasatzia te, Kawnpui-Sairang inkarah phei chuan commercial vehicle (sumdawnna lirthei) tam tak an tlan ngam tawh lo thu dante Dr Krishan Kumar a hrilh a ni.

NHIDCL Managing Director chuan, kawng chhia chu pawi a tih thu sawiin, NHIDCL technical director Amarendra Kumar chu Mizoramah chak zawk leh tluang zawka hna an thawh theih nan a hmuna enpui turin Mizorama a tirh nghal thu a sawi.

Dr Krishan Kumar chuan, Mizoram chief minister Lalduhoma ngen angin Mizorama NHIDCL hotu ber executive director Virendra Jakhar chu an thlak a, Adelbert Susungi an ruat nghal thu Lok Sabha MP a hrilh. Kawng siam nan cheng vbc. 50 pek a nih tawh a, fûr avangin hna an thawh chak theih loh thu leh Kawnpui-Sairang inkar chu thla khat chhunga thawm ṭhat zawh an tum thu a sawi bawk.

Mizoram Lok Sabha MP chuan Dr Krishan Kumar chu Mizorama NHIDCL hnathawhte a hmuna en turin a sáwm a; Krishan Kumar pawhin remchang hmasa berah Mizorama kal a tum thuin a chháng a ni.