Tlawng tui nú vangin FIR thehlut

Tlawng lui tinutu nia hriat mi pahnih lakah Centre for Environment & Social Justice (CEJS) chuan nimin khan Zonuam Police Station-ah FIR an thehlut.

CESJ chuan, Tlawng lui tinutu Ainawn Venga leivung paihna neitu chu Lalremchanga s/o Zonunsanga, Luangmual a nih thu tarlangin, kum eng emaw zat man chawiin leivung a paihtir tawh niin an tarlang a, "Leivûng chu Tuithûm luiah a lut a, Tuithûm luiin Aizawl khawpui tui tlan Tlawng lui a fin a, ruahsurin Tlawng lui a tinu ta ṭhin a ni," an ti.

Develop Blue Mountain-in Ainawn Venga Federation Enclave an sak meka leivungte pawhin Tlawng lui a tihnut nasa thu ziakin CESJ chuan, "An in sakna vûng chu Tuikual luiah an nawr liam ringawt a, mi tam takin harsatna an tawh phah bakah, Tuikual lui hian Tlawng lui a fin," an ti a; Blue Mountain Corporation-in Aizawl mipui nuai têl pawi an sawi niin an tarlang.

CESJ chuan, kum 2024-25 chhunga Tlawng lui pump tlak loa a nut chhan tam tak zingah Lalremchanga leh Blue Mountain Corporation chu a chhan lian ber nia an hriat thu an tarlang a, "An hlâwkna tura Aizawl mipui nuai 3 chuang harsatna an thlen hi sual thil tih a ni lo thei lo a, an thil sual tih hi uluk taka chhui a, an phu tâwk hremna an hmuh ngei theih nana hma la turin ka ngen che a ni," tiin FIR-ah an ziak a ni.