LMC hnena Saikuti Hall hlanna tur pawm

Saikuti Hall Managing Committee chu an chairman Navneet Mann, district bawrhsap hoin nimin khan an ṭhu a; Lunglei Municipal Council (LMC) hnena Saikuti Hall hlan dan tur ruahmanna, Terms & Conditions an thlirho a, an pawm.

Ṭhutkhawmah hian, tuna Saikuti Hall luah mektu sorkar department leh pawl hrang hrang panga zinga Managing Committee nena inremna la nungte chu luah chhunzawm phalsak an rêl a, inremna thar siam ngai chu LMC kuta a awm hnua siam thar atan dah ni se, an ti. Terms & Conditions an pawm tâk hi Saikuti Hall Managing Board pawmpui tura pek a ni ang.

Saikuti Hall hi Lunglei Venglaia awm a ni a, sq.ft 65,000-a zau niin, chhawng li-ah pindan 14 a awm a, puipunna hall-ah mi 1,200 vel an leng. A awmna ram chu Rural Development Secretary hminga awm a ni.

Management of Saikuti Hall Rules, 2003 hmangin Saikuti Hall enkawl a ni a, Rural Development Secretary kaihhruaina hnuaiah Saikuti Hall enkawl chungchanga thuneitu Managing Board a awm. Managing Board hnuaiah a taka enkawl hna thawk turin Lunglei DC kaihhruai Managing Committee a awm leh a ni.