Minister-in pánhnah ṭiak 3,000 hlan

Minister of state Prof. Lalnilawma chuan nimin khan a bial chhunga Saitual District Tung Grower's Association hnenah tung kûnga zâmtir turin pánhnah (phai pán) ṭiak 3,000 a hlan.

Prof. Lalnilawma chuan, panhnah sem tâkte chu tung chingtute'n an hlawhtlinpui ngei a beisei thu sawiin, "Tung chin piah lamah panhnah hmangin sum lak luh theih a ni a, hei hian eizawnna kawngah mi tam tak a pui thei dawn a ni," a ti.

Kut hnathawktute hmasawnna turin sorkarin ngaihtuahna a sêng nasa tih sawiin Lalnilawma chuan, "Tung herna khawl ṭha tak din tura hmalak tum a ni a, DRDO lamin khawl bunna tur hmunte tlawhin project an siam dawn," a ti a; tung hnuaiah aieng, coffee, panhnah leh thinghmarcha thlenga an thar theih nan hmalak zel tum a nih thu a sawi bawk.

Panhnah ṭiak semna inkhawm hi DRDO project director V Laldinsanga'n a kaihruai a; Saituala Horticulture officer Jacob Lalmalsawma leh Saitual District Tung Grower's Association president Zairemthanga te pawhin thu an sawi.

Saitual District Tung Grower's Association hian tung an tharte chu RZ Foundation, Serchhip kaltlangin Galaxy Company, Mumbai hnenah an hralh ṭhin a; kum thum chhung atan inremna an ziak a, inremna chu March 2026-ah a tawp dawn a ni.