CM's Special Package dawng turte thil hrilhfiah

Nimin khan Serchhip DC Pisapui Hall-ah Bána Kaih (Handholding) Scheme hnuaia Chief Minister's Special Package dawng tura thlan mi 392 pualin thil inhrilhfiahna hun hman a ni a; district bawrhsap Paul L Khuma'n a hmanpui.

Inhrilhfiahnaah hian mi 197 an tel a, mi dang 195-te tan vawiinah buatsaih leh a ni ang. Bawrhsap chuan, "He scheme hlawhtlinna tura mawhphurhna sang tak chu a dawngtute koah a innghat," a ti a; bul ṭanna tur sum an dawnte hmasawnna rahbi thar kai nan hmang ngei turin ṭanpuina dawngtu turte a chah.

Serchhip district-ah hian CM Special Package dawng turin mi 392 thlan an ni a; Commerce & Industries department hnuaiah mi 140, AH&Vety-ah mi 127, Agriculture department-ah mi 14, Horticulture-ah mi 58, Fisheries-ah mi 36, Soil & Water Conservation-ah mi 10, Sericulture-ah mi paruk leh Information & Public Relations department-ah mi pakhat thlan a ni.