Sairang rel station lungphùm phúm Mizoramin infrastructure a neih that chuan Per capita sang ber a ni vat ang - Railways Minister

Union Railways minister Suresh Prabhakar Prabhu chuan, nimin khan Suaka Memorial Cricket Ground-ah Sairanga rel chawlhhmun (station) sak tur lungphùm a phúm. Rajen Gohain chuan, Mizoram chu hmasawnna ruhrel (infrastructure) a neih ṭhat chuan mimal sum lak luh chawhrualna (per capita income)-ah India ramah a san ber thuai tur thu a sawi.

Railways Minister chuan, Mizoramah tun ṭum hi vawi 10 a kalna a nih thu sawiin, "Mizoram hi hmun nuam tak a ni. Atal Behari Vajpayee hun laiin Environment & Forest, Power etc. minister ka nihna angin vawi kua ka rawn kal tawh a, Railways Minister ang chuan tun hi vawi khatna a ni. State ropui tak, nunphung ṭha tak nei, hnam huaisen tak in ni," a ti.

Mizoram chu remna leh muanna awmna hmun a nih thu sawiin Suresh Prabhu, "In ram leilung a ṭha a, mipuite an thawkrim em em a. Hmasawn tura thil pawimawh in nei ṭha hle a, in neih loh chu infrastructure ṭha a ni. State dang rualin Mizoramin infrastructure lamah hma a sawn vel zel tawh ang," a ti a; Mizoram chu India rama per capita income sang ber a nih thuai tur thu a sawi.

Suresh Prabhu chuan, Bairabi-Sairang inkara rel tlân tur chu tualchhung mite'n an hlâwkpui a
ṭul tih sawiin, "Infrastructure lama hmasawnnaah hian tualchhung mite ngaihthah a thiang lo. Mizoram hi India ramin hma a sawn rualin hmasawntir kan tum. Mizoram hi India rama state pakhat mai a ni lo a, state pawimawh tak a ni a, India ram tan a la pawimawh telh telh dawn," a ti.

Governor Lt. Gen. Nirbhay Sharma chuan, hmasawn turin Mizoram-in inkalpawhna
ṭha a mamawh thu sawiin, "Hma-sawnna hna thawh dawnin ram laknaah harsatna a tam ṭhin. He harsatna hi awm lo se, hma-sawnna a kal chak ang," a ti a; Railways hotute chu Sairangah damdawi-in leh sikul ṭha tak mipui tana din turin a ngen.

Chief minister Lal Thanhawla pawhin thu sawiin, "Vawiin hi Mizoram tana hun lawmawm tak a ni. Railways hi public transport atan thil pawimawh tak a ni a. Rel lo lut tur hi kan economy atana thil pawimawh tak a nih bakah, mi dangte nena inunauna atan pawh a pawimawh," a ti.

Sorkar laipuiin Mizoram hmasawnna atana ruahmanna a siam avanga a lawm thu sawiin CM chuan, "Mizoram hmasawnna atana a thil tihahte, Myanmar nena intlawhpawh theihna atana kawng siamna atana a sum dahte avangin prime minister Narendra Modi hnenah lawmthu ka sawi a ni," a ti a; Prime Minister hi nakkum March thlaah Tuirial Hydel Project leh Chhingchhipa Sainik School hawng tura sawm a tum thu a sawi.

North East Frontier Railways General Manager chuan, ram leilung awm dan te, ruahtui a tlak tam vangte leh thil dang vangin hna thawk chak thei lo mah se, hun tiam hmaa thawh zawh hman ngei an tum thu a sawi.

Inkhawmah hian minister of state for Railways Rajen Gohain, Lok Sabha MP CL Ruala leh Mizoram Transport minister John Rotluangliana-te pawhin thu an sawi.

Railways Minister hian lung-phûm a phûm zawhah State Guest House-ah thuthar theh-darhtute a kâwm a; India ramah transportation atan rél a pawi-mawh hle tih sawiin, "Railways hian ram hmasawnna atan mawhphurhna leh pawimawh tam tak a nei a ni," a ti.

Vanglaini palai zawhna, 'Tlang ram leh leimin duhna hmuna rel kawng tam tak siam a him leh him loh' chungchang chhangin Suresh Prabhakar Prabhu chuan, Railways chuan a hmunhma azirin ruahmanna an siam theih thu a sawi.

Minister ṭawiawmtu, North East Frontier Railways hotute chuan, Mizorama rêl kawng an siamna atan a bik takin project an siam thu an sawi a, "Leimin hlauhthawnna hmunte chu tunnel leh leiverh hmangtein a theih ang angin kan veng a ni," an ti.

NEF Railways hotute chuan, Sairanga rêl a thlen hun chuan hmarchhak tana hmun pawimawh Guwahati thleng direct-a rél tlantir phawt a, a ṭul dan azir zela hmun dangah pawh tlantir zel an tum thu Vanglaini an hrilh.

Railways minister hian nimin tlai khan Governor leh CM-te a kâwm a; nizan khan Aizawlah riakin, vawiinah Lengpui Airport aṭangin Imphal a pan ang.

Bairabi-Sairang rel kawng siam mek hi March 2019-a zawh tura tih a niin, kum 2020-ah rél tlan ṭantir tura ruahman a ni a; mahse, NEF Railways hotute chuan December 2019 aṭanga tlan ṭantir theih an inbeisei.

Bairabi-Sairang rel kawng siam tur hi km. 50.38-a thui a ni a, a siamna atan cheng vbc. 2384.34 ruahman a ni. Km. 50.38 chhungah hian leiverh (tunnel) 23 leh lei (bridge) 142 a awm dawn. Sairang bakah hian Mualkhang, Hortoki leh Kawnpuiahte rel chawlhhmun a awm dawn a ni.