Isua laka tlâk- tlum kan duh ber - Lal Thanhawla

Chief minister Lal Thanhawla chuan, Congress sorkar chuan Isua laka tlaktlum an duh ber nia sawiin, "Pathian tel lo chuan engmah kan ti thei lo," a ti.

MPCC president Lal Thanhawla hian nimin khan Congress Bhavan-a inkhawmah thu sawiin, "Kan ram hi Pathian
ṭanpuinain ram ropui, mite hriat thama kalpui kan tum," a ti a; Congress party lo chu mipuiin sorkartir tur an hriat rih loh avangin inthlan lehah pawh an sorkar leh ngei dawn niin a sawi.

Lal Thanhawla chuan, Congress party chu India rama policy nei ṭha ber nia sawiin, "Mirethei chawikanna tur lam hawi leh sakhua inngeih tlang taka kan awm theihna tura policy neitu chu Congress party hi a ni. Kuta thisen kai party an awm a, vai laka tlâktlum tum party an awm bawk. Keini chu Lal Isua laka tlaktlum hi kan tum ber a ni," a ti.

Chief Minister chuan, Chhingchhipa Sainik School tur buatsaih mek chu nakkum aṭangin class ṭan a ni dawn tih sawiin, "Central-a hotu-te'n an rawn endik tawh a, ṭha an ti. Hei hi ṭhalaite tana khawvel thar siamna kawnga hmalak-na kal zel a ni," a ti.

Ṭhalaite'n mahnia eizawnna an neih theih nan skill development centre a theihna apiangah an hawn zel thu sawiin, "Kan thawh duh loh leh peih loh vangin ram dang mi nuai tel an lo lut a, kan rama sum chámbáng tur cheng vbc. tél min laksak a, sumte hi kan hum theihna turin
ṭhalaite'n ṭan kan lak nasat a ngai," a ti.

Lal Thanhawla chuan, NEDP aṭangin CM Rural Housing Scheme siam a ni a, thingtlanga mahnia in sa thei lote in saksak an nih dawn thu te, Tuirial Hydro Electric Power Project chu March 2017-ah hawn theih an beisei thute a sawi bawk.

Nimina Congress party inkhawmah hian MPCC president Lal Thanhawla'n an party zawm thar mi 328 a lawm lut niin Congress party thuchhuah chuan a tarlang.