Sorkarin contractor leh supplier-te hnenah sum pe chhuak rih dawn lo

Finance minister Lalsawta chuan, November 9, 2016 aṭanga Rs. 500 leh 1,000 note a thih tak avangin, mipuiin sum hman turah harsatna an tawh loh nan sorkarin contractor leh supplier-te hnenah sum a pe chhuak rih dawn lo tih a sawi.

He thu hi Finance Minister hian nimina Peter Street-a sum enkawl leh vawn dan zirna, Accounting & Finan-cial Management Institute (AFMI) din thar a hawnnaah a sawi a ni.

Lalsawta chuan, India sorkarin cheng 500 leh 1,000 note a tihtawp chu pawisa lem léng vel leh dan loa sum chhehrelhin ram economy a tihchhiat theihna venna tur te, ram himna thlenga a tihderthâwn theih vangte a nih thu a sawi a, "Hun eng emaw ti chhung chu buaithlak deuh mah se, manganna tur a awm lo. Mipuiin sum hman turah harsatna an tawh loh nan sorkarin contractor leh supplier-te sum a pe chhuak rih dawn lo," a ti.

Finance Minister chuan, sum enkawl leh vawn danah 'Lian tura tê lua a awm lo a, tluchhe tura lian lua pawh a awm hêk lo' tih thufing chu chhungkua aṭanga inṭanin, pawlah leh sumdawnnaah te, office lian ber thlengin a dik reng dawn tih sawiin, sum enkawl dan fel tawk lohnaah chuan company lian tak takte pawh an tlachhe thuai ṭhin tih a sawi.

Lalsawta chuan, sum enkawl kawnga mi rintlak leh pawl tana sum hman daihzâi dan thiamte kaihhruaina hnuaia managment nei ṭha apiangte enkawl chu pawl leh sorkar pawh an hlawhtlin nge nge ṭhin tih a sawi a; April 2017 aṭanga Goods and Service Tax lak tur leh New Economic Development Policy atante fincial managment leh accounting thiam pawimawhna a nasa tial tial dawn tih sawiin, "Heng atan hian AFMI hi a pawimawh hle dawn a ni," a ti.

AFMI hawnna inkhawm hi Dr Joseph Lalhmingthanga’n a kai-hruai a, Finance department-a addi-tional secretary Lalmalsawma'n sorkar sum vawn dan a sawi.

AFMI hi Zo Financial Solutions (ZOFINS)-in an din a ni a; basic accounting and book keeping, inventory management leh tally-zir theih a ni. Batch hmasa ber chu November 15, 2016-ah an ṭan ang.