KHAWTHLIR

YMA-in Bru-te Lo lawm an tum

YMA Taitesena Group chuan thuchhuah siamin, Tripura aṭanga Bru lo kîr turte lo lawm nan welcome banner tar an tum thu an puang a; chutih rualin, tun ṭuma lo let turte chu an group huam chhungah luh an phal lo thung. Sorkar aiawhte puibawmin duty indah an tum bawk a, Kawrtethawveng, Tuidam, Kawrthah, Zamuang leh Rengdil branch YMA-te kal turin an ruat a ni.

High Court Additional judge

Mizo ukil, Nelson Sailo chu sorkar laipuia Ministry of Law and Justice (Department of Justice) chuan Gauhati High Court-a additional judge atan a ruat. An ruatna notification chu November 10, 2016 khan Ministry of Law and Justice joint secretary Rajinder Kasbyap-in a tichhuak a; a rualin mi dang pali ruat an ni bawk.

CCTV hawng

Aizawl City Surveillance (CCTV) project phase thumna chu nimin khan Aizawl SP pisa conference hall-ah Home minister R Lalzirliana'n a hawng. Tunah hian Aizawl khawpui chhung hmun 33-ah CCTV camera 185 vuah a ni tawh a, Aizawl SP Office building-ah main control room dah niin, police station hrang hrangah sub-control room dah a ni bawk.

HIV/AIDS sawiho

UN AIDS leh World Vision India-te chuan nimin khan IPR directorate conference hall-ah HIV/AIDS chungchanga inrawnkhawmna an buatsaih a, HIV veite ham-
ṭhatna tur leh an tana hna thawh dan tur an sawiho. He hunah hian HIV/AIDS dona kawnga hma latu pawl hrang hrangte leh HIV vei intêlkhawm pawlte an tel a ni.

Free clinic

Tlabung damdawi-ina thawkte chuan senior medical officer Dr LP Malsawma hoin nimin khan Tuichawng khuaah a thlawna inentirna an buatsaih. Free clinic-ah hian mi 156 an inentir a, a thlawnin damdawite an pe nghal a ni.