Mizoramah Rs 2,000 note thar a thleng

Rs 2,000 note thar, November 10-a tihchhuah tâk chu nimin khan Aizawlah a rawn thleng tawh.

Hetihlai hian sorkar laipuiin November 9, 2016-a Rs 500 leh Rs 1,000 note hman theih loha a dah hnuah, nimin khan bank hrang hrangah pawisa thleng tum mi eng emaw zat an awm.

Thu dawn danin, Mizorama bank hrang hrangte chuan Ningani aiin Zirtawpni khan pawisa pek chhuah tur an nei tam tawh zawk. Rs 500 leh Rs 1,000 note hman theih loha tih a nih avang hian Mizoramah harsatna lian tham thleng hriat a ni lo a; sumdawng eng emaw zatin note hlui dawng lo mah se, dawng duh
ṭhahnem tham tak an awm.

Mizoram Rural Bank (MRB) hotute chuan, November 10 khan an branch ṭhenkhatin sum pek chhuah tur nei lo mah se, an branch tam takin sum an pe chhuak a, an thlengsak bawk tih an sawi. November 10 bikah hian account-a dah lut zawng zawng chu mi 8,311 an ni a, mi 4,014-in an account aṭangin sum an la chhuak tih sawiin, "Report dawn theih chinah Rs 500 leh Rs 1,000 note thleng zawng zawng belhkhawm hi cheng nuai 15 chuang a ni," an ti.

MRB hotute chuan, Rs 500 leh 1,000 note tihthih chungchangah MRB-in anmahni dawrtute harsatna leh mamawh sukiang turin theihtawp an chhuah tih an sawi a, "Dawr theih hun chhung pawh tlai dar 4 thlenga pawhsei a ni," an ti a; a buaipuitu bik nodal officer leh supporting officer an inruat bakah, RBI thu angin, vawiin leh naktuk Pathianniah pawh an inhawng dawn tih an sawi.