National Pharmacy Week hman a ni

Mizoram Pharmacists' Association (MPA) chuan nimin khan Tourist Lodge, Chaltlangah 'Mizo-ram Pharmacists' Gene-ral Conference 2016 cum National Pharmacy Week' an hmang a, Health minister Lal Thanzara'n a hmanpui.

Health Minister chuan, Pharmacist hna ruak tam tak a awm tih a hriat thu sawiin, "Sum harsatna karah pawh mipuiin an mamawh avangin pharmacist hna eng emaw zah tal chu lak a nih theih nan hmalak mek a ni," a ti a; pharmacist-te chuan an thiamnate damdawi-inah te, mipui zirtirna atan leh ramhmul damdawi siam chhuahna atante ṭangkai taka hmang turin a chah.

Lal Thanzara chuan, mipui hriselna atan pharmacist-te mawhphurhna a sang tial tial a, mipui hriselna atana an mawhphurhna an hriat thar a duh thu a sawi a, "Damdawi chi tam tak damdawi dawrah lei theihin a awm a, hengte hi a nihna dik tak hre chiang a, pe chhuak theitu awm-chhun chu pharmacist-te chauh an ni. Mizoramin damdawi siam chhuahna kan la neih loh avangin, damdawi siam chhuah sa kan zawrhte hi a him leh him loh te, dik taka zawrh leh lei a ni em tihte pharmacist-te'n an ngaihven reng tur a ni," a ti.

Health Minister chuan, damdawi thianghlim leh him mipui tana lei tur a awm theih nan damdawi dik lo man chhuah kawngah sorkar tan ṭhahnem ngai zel tur leh medical reimbursement dik lo chhui chhuahna kawngah pawh inthlahdah loa sorkar vênpui zel turin pharmacist-te a sáwm a; computer leh internet-te hmang ṭangkaia intât hriam reng tur leh, doctor leh nurse-te tan ràwn theih nih tum zel turin a fuih bawk.

Minister hian MPA Annual Magazine Mizoram State Pharmacists' Council website a tlangzarh a; RIPANS aṭanga B.Pharm graduate thar zinga ti ṭha ber Lalrengpuii leh Laithangpuii College of Pharmacy aṭanga Diploma in Pharmacy-a ti ṭha ber C Lalnunpuia te hnenah SL Sailo Pharmacy Award hlan a ni. Chawhnu lamah zunthlum enkawlna leh pumpelhna kawnga pharmacist-te mawhphurhna an an zirho.

MPA report-a a lan danin, Mizoramah registered pharmacist 323 an awm mek a ni.