Asapara-ah Mizoram Bru enfiah

November 2016 tawp lam aṭanga Mizoram Bru raltlante, Tripura relief camp aṭanga lak let tum an nih vanga enfiah hna chu nimin khan Asapara camp-ah chhunzawm leh a ni a; chhung-kua 234-a mi 1,566 enfiah an ni.

Nimina Asapara camp-a enfiahnaah hian chhungkaw 234-a mi 1,566 enfiah an ni a, puitling 1,126 leh naupang 440 an ni. Chhungkaw 139-a puitling 668 leh naupang 278, mi 946 chu Mamit district mi an ni a; chhungkaw 95-a mi 620, puitling 458 leh naupang 162 chu Kolasib district mi an ni. Lunglei district mi enfiah tur an awm rih lo thung.

Asapara camp-a Bru-te enfiah hna hi vawiinah chhunzawm a ni dawn a, chumi hnuah Naisingpara panin, Naisingpara camp-a mite November 15-18 inkarah an enfiah ang a, November 21-ah Hazachera camp-a mite enfiah leh ang. Bru enfiah nan hian kum 1995-a electoral roll hman a ni.