Kelkang khaw tui lakna a hawng

India rama ni zung chakna hmanga tui pump project lian ber pawl, Kelkang Water Supply Scheme chu nimin khan bialtu MLA JH Roṭhuama'n a hawng a; PHE minister Zodin-tluanga'n inkhawm a kaihruai.

Kelkang Water Supply Scheme (Solar) hawnna hi Kelkang community hall-ah buatsaih a ni a; JH Roṭhuama chuan, "Harhnain a awm chilh hnua Kelkang khua mikhualin an chîm buai nasatzia ngaihtuahin, Kelkang khaw mipuite dawhtheihna leh inpeknate avangin Pathianin mal a sawm a. Kelkang khaw chhawm-dawlna atan NLUP kaltlangin tui dahkhawlna tur tuizêm, bawlhhlawh báwm, ek-in khur leh thil dang mamawh zualte ngaihtuah a nih bakah, tui hnianghnâr an neih theih nan kawng chi hrang hrang dap a ni," a ti.

JH Roṭhuama chuan Kelkang Water Supply Scheme chu India rama ni zung chakna hmanga tui pump project lian ber a nih thu leh Asia-ah pawh a lian ber a nih an rin thu a siamtu company-te'n an sawi tih a tarlang a; Kelkang khaw mipuite chu an rohlu neih thar chu roh tak leh duat taka enkawl turin a chah.

Inkhawm kaihruaitu PHE minister chuan, Kelkang khaw mipuite'n Pathian malsawmna an dawng chu a lawmpui bakah malsawmna an dawnna hmanrua atana Pathian-in PHE department a hmang chu vanneihthlak a tih thu leh lawmawm a tih thu a sawi.

Kelkang Water Supply Scheme-ah hian ni zung chakna hmangin Bangla lui tui lak chhoh a ni a, chuta tan chuan Bangla lui chu litre 20,000 dawng turin an khuap a ni. Bangla lui aṭangin booster pump hmun thumah siamin, metre 520-a sang Kelkang Vengchunga tuizem lian, tui litre 1,00,000 dawngah a lut a, main reservoir bakah hian Kelkang Thlanmual chungah tui litre 50,000 dawng zonal tank siam a ni bawk.

Kelkang Water Supply Scheme hi NABARD kaltlangin cheng nuai 631 sênga siam a ni a, mi 2,000 châwm thei tura ruahman a ni. Ni zung chakna hmang tura ruahman a nih angin, tui pump khawl châwm tur hian solar plate 204 hman a ni a, kumtluanin ni tin tui litre 82,000 a pump thei tura beisei a ni.