HTE Minister-in RUSA hnuaia zirtirtute hlawh tur a nawr chhuak - MNF party

MNF party chuan thuchhuah siamin, Rashtriya Uchchatar Shiksha Abhiyan (RUSA) hnuaia assistant professor-te hlawh tur cheng nuai 521 chuang a nawr chhuak niin an tarlang.

Mizoram sorkar college hrang hranga RUSA hnuaia assistant professor 72 la turin Ministry of Human Resource Development (MHRD)-in a phalsak a, MPSC kaltlanga lak niin, zirtirtu atana lâkte chuan November 2019-ah hna an zawm a ni.

RUSA hnuaia assistant professor 72-te chu la rawih chhunzawm zel an ni tih sawiin MNF chuan, "Covid-19 vangte pawh a ni ang a, sorkar laipui chuan hun rei tak an hlawh tur an rawn sanction thei ta lo a ni. Hei bakah hian, Central sorkara RUSA enkawltu official lam an lo inthlak kual ve sek nen, an hmalakna a khaihlak nasa hle a ni," an ti.

MNF chuan, "Higher & Technical Education minister Dr R Lalthangliana'n theihtawp chhuahin DO letter-te siamin Central sorkar thuneitute a dâwr a, ṭawngka pawhin vawi tam tak an hlawh tur bik chu ngai pawimawha sanction hrâm turin a nawr reng a ni," an ti a; sorkar laipuiin Krismas hmaa hlawh tur sum pek a nih tur thu HTE Minister an hrilh laiin, an tifel hman ta lo niin an sawi.

An tarlan danin, December 30, 2020 khan RUSA hnuaia assistant professor-te hlawh tur Rs. 5,21,64,000 sanction order chu MHRD-in email-in HTE minister Dr R Lalthangliana an rawn thawn a; 2021 kum tirah hlawh pek theih tawh tura ngaih a ni.

MNF chuan, Dr R Lalthangliana chu minister chak leh viak ṭha a nia sawiin an chhuang thu an tarlang a, "Mizoram sorkar thuneihna a ni loh avangin thawktute pawhin hun rei tak an lo hrethiam kha an chungah MNF chu a lawm hle a ni," an ti. RUSA kalpui danah Mizoram chu a ti ṭha ber tia sawi a nih thu, MNF chuan an tarlang bawk.