Bank-ah pawisa a thleng ATM tam zawk a hman theih tawh dawn

State Bank of India chuan Mizorama ATM an neih 80 zinga 50 chu vawiin hian hman theiha an peih hman an beisei a, Rs 2,000 note thar pawhin Mizoram a thleng tawh a, hun rei lo te hnuah pawisa thi avanga buaina hi a kiam theih an beisei thu Vanglaini an hrilh.

State Bank of India (SBI) Aizawl Branch-a Assistant General manager (AGM) Pradip Kumar Sen chuan, "Tunah hian mipui tana awlsamna zawngin theihtawp chhuahin kan thawk a, kan thawk chhunzawm zel ang. Kan ATM pawh mipui hman theiha peih thuai kan tum a, Thawhṭanniah hi chuan ATM 80 zinga 50 hi hman theiha peih fel kan beisei," a ti.

Mizorama bank dang hnenah pawh pawisa an pek chhuah tawh avangin mipui nawlpui harsatna chu chinfel thuai a beisei thu a sawi a, Mizoram hmun hrang hrangah SBI ATM kal tlanga pawisa lak chhuah theih turin ṭan an la zel tih a sawi lang bawk.

Pawisa note tihthih avanga bank hnathawktuten harsatna an tawh dan Vanglaini zawhna chhangin SBI Aizawl Branch-a AGM chuan, "Pawisa thih aṭanga a ni lina a ni ta a, kan hna hi a lêt nga vela pung ang a ni a, hei hi hnathawktu ngai rengin theihtawp chhuahin an thawk a, kan staff-te ka fak takzet a ni. Ṭum dang aiin hna kan ngah a, kan hnathawh chhung a rei a, Pathianni pawh kan chawl lo a, hmun tin aṭangin dawrtu leh be pawptu kan nei reng a, chuti chung chuan mipui tana dawr hrehawma awm lo turin kan inchah a, kan zawm ṭha thawkhatah ka ngai," tiin a sawi.

SBI hotupa hian Mizoramah Rs 2,000 note thar a thlen tawh thu leh, Rs 500 note thar tur pawh a thlen thuai a beisei thu a sawi a, "Pawisa thlen hun leh a thleng tur zat hi chu secutiry thil avangin ka sawi thei lo a, ka sawi theih erawh chu mipui mamawh tur Rs 500 note thar hi chu hman theiha an tihchhuah hunah Mizoram pawh a lo thleng thuai ang. Sorkar laipui leh Mizoram sorkar pawhin ṭan an la nasa a, Mizoram hi kan buai lohna turin theihtawp an chhuah tlang a ni," a ti a; state dangte aiin Mizoramah pawisa thi avanga buaina hi a tlem zawka a hriat thu a sawi lang.

SBI staff-te dawr an nuam lo tia sawi ṭhin chu Pradip Kumar Sen chuan zawi zawia an insiam ṭhat thu a sawi a, tunlai thil thleng bikah pawh hmun hrang hrang aṭanga fakna aw kâ an dawn chuan hnathawktute a tiphur hle tih a sawi bawk.

Nimin, Pathianni pawh khan SBI leh bank dangte hian pisa an kai a, ATM-ah pawh mipui ṭhahnem tak pawisa lak chhuah tumin an intlar a ni.